Wala’y dungog nga kadaugan

Nanghanig nang daan si Senador Grace Poe nga wala’y lami ang kadaugan tali sa iyang mga kaatbang kun ugaling hingpit na nga ma-disqualify ang iyang kandidatura sa pagka-presidente sa election sunod tuig.

Alang ni Poe ug sa iyang runningmate nga si Senador Chiz Escudero, wala’y mandato sa katawhan ang si bisan kinsa nga modaug tali nila ni kanhi DILG secretary Mar Roxas ug Bise Presidente Jejomar Binay nga maoy iyang gipasanginlan sa disqualification case nga  giluwatan sa COMELEC second division.

Samtang wala pa mahuman ang sangka ug ang pakigbisog ni Senador Poe sa alang niya katungod sa mga foundling nga  mahatagan og tingog sa padumala sa gobiyerno ug sa alang niya katungod sa mga Filipino sa pagpili, dili sab siya molunga sa iyang paningkamot nga modaug.

Ambot lang kun gihimo nang “trend” sa mga politiko karon ang dili paglunga sa alang nila pakigbisog, ug pagkampyon sa kahimtang sa mga kabus sa pagpalambo sa ilang mga politikanhong ambisyon.

Samtang dali kaayo nga nakatudlo si Senador Grace Poe sa iyang mga kaatbang sa politika nga maoy responsable sa iyang disqualification case sa COMELEC, dali usab nga nakapangulipas ang iyang mga kaatbang.

Si Mar Roxas dali nga nisumbalik nga wala motug-an sa tinuod si Senador Poe sa tinuoray nga estado sa iyang residency.

Ambot kun nahutdan na ba, kun aduna man o wala gyuy klarong mga programa ug kongkreto nga mga solusyon ang mga mokandidato, busa magpinangitaay na lang sila og bisan unsang buslot sa ilang mga kaatbang nga tan-aw nila klaro silang dehado.

Ang resulta inay sa mga tino nga isyu ang tutokan sa mga personal ug sa mga pakapin na lang nga mga isyu ang mapahimug-atan. Klaro nga gilipat ang atensyon sa publiko.

Unta nga maamgohan kini ug makonsensya ang mga politiko nga nangangkong nagpakampyon sa kawsa sa mga kabus nga wala gyuy lami ang ilang kadaugan kun dili nila hingpit maangkon ang tinuoray nga mandato sa katawhang nakasabot ug wala malimong-limong sa ilang mga politikanhong pagmaniobra aron mapalusot ang ilang mga interes.

Tinuod wala gyuy lami ang kadaugan dili tungod sa default, kun dili tungod sa ilang kapakyas sa paghatud sa tinuoray nga serbisyo ngadto sa katawhan nga maoy tinuoray nga magmadaugon kun ila kini nga matagamtam.