EDITORYAL - Duterte VS. Simbahan

Midako na karon ang guna sa relasyon ni Davao City Mayor Rodrigo Duterte ug sa Simbahang Katoliko tungod niining binayloay og dili maayong mga alegasyon, matinuod man o dili.

Sukwahi sa gibuhat sa iyang mga kaatbang nga nag-atakihay sa usa’g-usa aron dauton sa mata sa mga botante ang ilang mga kontra, si Duterte lahi og paagi pagkuha sa simpatiya sa mga botante.

Apan kining gibuhat ni Duterte sama kini sa nagduwa siya sa kalayo, mahimo siyang mapaso niini kay adunay posibilidad nga dili maayo ang epekto niini sa iyang kandidatora.

Dominante ang Simbahang Katoliko sa Pilipinas ug posible nga bisan sa hilom mahimo silang makapausab sa resulta sa eleksyon pinaagi sa pagsimpatiya sa mga botante ngadto sa Simbahan inay kang Duterte.

Ang Simbahan mipasalig hinuon nga dili nila diktaran ang katawhan apan tudloan sila aron mahimong edukado nga botante.

Atong paabuton kun kini nga baruganan magpabilin human nga direktang gisungag ni Duterte ang mga pari dihang siya mipasangil nga siya biktima sa pagpangmolestiya sa usa ka pari dihang nagtungha pa siya sa high school.

Mahimo usab hinuon nga makatabang kini sa kandidatora ni Duterte sa pagka-presidente. Kini kun ang mga tawo dili maglantaw sa kaayohan nga nahimo sa Simbahan ug sa ilang tan-aw si Duterte mas dako og mahimo kun kini mahimong presidente.

Dili ikalimod sa hilom daghang tawo ang dili ganahan sa Simbahan gumikan sa nagkadaiyang rason. Ang uban personal ug ang uban di ganahan sa mga tawo nga nagpadagan niini.

Kining gibuhat ni Duterte nakapaukay na kaayo sa katawhan, dili normal nga paagi sa pagpaila sa iyang kaugalingon apan sama sa uban, nakakuha gyud siya og atensyon niini ug pinaagi sa iyang gibuhat gitutokan matag karon ug unya ang sunod niyang buhaton.