Benepisyo sa hustong katulog

Nunot sa kapaspas karon sa kalamboan sa ekonomiya ug teknolohiya, hapit dili na lang kita matulog tungod kay kanunay kita nga may giapas.

Sama sa mga deadline ug daghang commitments nga kinahanglang matapos. Maayo na lang kun adunay tag tulo, labing taas lima ka oras, nga kinatulgan.

Sa pagsulbong karon sa mga call center ug sa daghan na nga mga kalihukan ug kalingawan sa kagabhion, hapit ato na nga balihon ang oras. Ang adlaw ato na nga himoong gabii ug ang gabii mao nay atong adlaw.

Apan angay nato hinumdoman nga ang kahimsog sa panglawas maoy atong bahandi ug puhonan sa pag-asenso. Busa, dili gyud unta nato kini abusohan.

Sa pag-abuso wala kini nagpasabot lang sa mga bisyo sama sa panigarilyo, pag-inom og alcohol, paggamit sa ilegal nga drugas, pagtukaw tungod sa sugal ug uban pa nga matang sa makadaot nga bisyo.

Dili man diha-diha maningil ang lawas, apan kun moabot na kini sa iyang kinutoban, diha makaingon kita nga mas maayo pa nga matibway na lang ang tanan.

Usa sa mga pamaagi sa pag-amping sa panglawas mao ang pagkatulog sa husto nga oras.

Kun nakamatikod mo, bisan ang mga bata karon sa bag-ong henerasyon tagdugay na nga matulog. Ako nang namatikdan sa akong pag-umangkon nga maabtan na lang og tag alas 12 sa tungang gabii nagmata pa tungod kay nagbuhat pa sa daghang assignments sa tunghaan.

Samtang ang ubang mga batan-on bisan sa alas 11:00 sa gabii anaa pa gihapon nagyampungad sa computer, naka-online o ba kaha sa mga salida sa TV.

Unsa ba ka importante ang pagkatulog?  Base sa National Institutes of Health, ang pagkatulog adunay dakong papel sa maayong panglawas ug sa panglantaw sa usa ka tawo.  Ang pag-angkon og maayong kinatulgan sa tukma nga oras makatabang pagpanalipod sa imong panghuna-huna, kahimsog sa panglawas ug kaluwasan.

Sa usa ka artikulo sa NIH, nagbutyag nga ang imong bation ug mga gimbuhaton magdepende kun unsay nanghitabo samtang ikaw nakatulog.

Kini tungod kay samtang ikaw natulog ang imong lawas nagtrabaho gihapon aron suportahan ang kahimsog sa imong utok ug mamintenar ang imong maayong panglawas. Alang sa mga bata ug sa mga batan-on, ang tukma nga pagkatulog makatabang kanila sa pagtubo ug paglambo.

Kun nakahinumdom mo sa gagmay pa kita, ang atong mga ginikanan mopugos gyud nato sa pagpakatulog, ilabi na sa udto aron kita motubo.

Alang sa mga nagkuwang sa katulog, diha-diha ang dautang epekto niini. Sama pananglit kun nagmaneho ka og sakyanan, tungod kay nakatulog samtang nag-drive, ang resulta makabangga.

Ang kakuwang sa tulog moresulta usab sa daghang sakit sa lawas. Makaapektar usab kini sa imong panghunahuna, sa pagbati, trabaho, pagsabot ug sa imong pagpakigrelasyon sa uban.

Girekomendar ang pito ngadto sa walo ka oras nga kinatulgan sugod alas nuybe nga dili molapas sa alas 11:00 sa gabii.