20,000 ang nahalaran
Kapin sa 20,000 ang naalagaran sa ika-20 nga Grand Halad sa Kapamilya, ang labing dakong piyesta sa libreng mga pangalagad ning bahina sa nasud, nga gipahigayon tibuok adlaw niadtong Sabado sa Main Campus sa Cebu Technological University (CTU) sa kinasang-an sa mga dan M.J. Cuenco ug R. Palma sa Dakbayan sa Sugbo. Naa na sa iyang ika-napu nga tuig, ang nagkalapad nga Grand Halad gipahigayon kaduha sa usa ka tuig, matag Hunyo (atol sa anibersaryo sa DYAB Abante Pa, Bisaya!) ug matag Nobiyembre (sa di pa malinga ang tanan sa pagpangandam sa Pasko ug Bag-ong Tuig).
* * *
Sama sa nangaging katuigan, naalagaran sa Grand Halad niadtong Sabado ang mga taga Sugbo ug silingang mga lalawigan sa Kabisay-an, labi na sa Bohol ug Leyte. Labing sayo nila naglinya sa palibot sa CTU sa wa pay alas-4 sa kadlawon. Pagka alas-6 sa buntag nasugdan dayon ang libreng medical services sa Kasadya Gym. Labing unang niabot pag-atiman sa mga pasyente si Dr. Edisa Ermac, nga mao say nag-organisar og medical team gikan sa Perpetual Succor Hospital. Nisunod pag-abot si Dr. Danilo Dionson nga sa nangaging pila na ka Grand Halad wa mobiya hangtod nga naalagaran ang kataposang pasyente.
* * *
Si RC Dalaguit, ang DYAB Anchor nga maoy tagduma sa Grand Halad, nihatag namo sa listahan sa mga naalagaran: 2,968 ang nakalibre sa konsultasyon ug mga tambal; 53 ang nahimoan og minor surgeries sa Philippine College of Surgeons; 1,050 ang nahatagan og libreng laboratory services; 517 ra ang nalibre sa dental services kay sayo ming nahutdan og anaesthesia; 2,800 ang libreng nakapahiling sa ilang mga mata ug nakaangkon og libreng antipara; 1,698 ang nakapamasahe, nakapa-reflex, nakapatupi ug ubang wellness services; 652 ang naalagaran sa one-stop shop sa mga buhatan sa gobyerno; 163 ang libreng nakakonsulta sa mga abogado ug nakapa-notaryo; 813 ang nakatambong sa nagkalainlaing seminars; ug 1,215 ang nakapabakuna ug nakapapurga sa ilang mga iro ug iring.
* * *
Kapin sa 5,000 ang nakatilaw sa libreng juice nga gidalit sa ABS-CBN TV Production nga gipangulohan ni Neda Avinante; 312 ang naka-printa og t-shirts sa DYLS Lupig Sila! nga giduma ni Odessa Rodriguez; 4,850 ang nakapahimus sa naalagaran sa Bantay Bata 163 Cebu nga gipangulohan ni Lutis Cimafranca; 1,600 ang nakaambit sa lugaw, puto, palitaw, bingka, ice cream ug ubang pagkaon; 60 ang nakahatag og dugo sa Philippine Red Cross; ug dul-an sa libo ka certificates ang napatik sa Innodata alang sa tanang boluntaryo. Ang tinuod hinuong bida sa Grand Halad maong kaliboan nga nipahimus sa libreng mga serbisyo. Silay tinuod nga bugkos nga nakapahiusa sa manggihatagong mga indibiduwal ug mga institusyon pagpahigayon sa talagsaong pasundayag sa pagtinabangay.
* * *
- Latest
