Nagsusapinday sa kahamugaway

Sagad sa makita nato sa tawo nga grabeng nahubog sa alak, mora ni'g manok gidungoy, dayo'g ligid nga wa nay kahimatngon sa kaugalingon. Naa say nagrabehan sa kahubog nga makatuyhad pa'g barug. Apan lagi iniglakaw, mobarag nga nagsusapinday, ingon sa nagpanikad sa way kusog nga kaisog. Sa susama'ng sitwasyon, aduna say mga tawo nga nahubog tungod sa kalampusang naangkon sa kinabuhi. Mga katigayonan nga subra na niyang napahimuslan sa kinabuhi. Buhong sa unsa may gusto sa kaugalingon. Nahubog sa kahamugaway, nga di na kapugngan ang pagpatuyang sa way kapuslanan.

Ingon sa himatyon ning nagsusapinday, nga naulipon sa bahandi, wala na makahibalo sa direksyon, nga nawad-an sa kabuot. Igo na lang sa diktar sa iyang kahamugaway, nga wala nay kontrol sa mahimong sangputan niini. Hangtud mao na lay naamgohan, nga nagsusapinday gihapon apan sa tumang kapait nga pag-antos. Kay lisud na mahibalik kadtong kaharuhay nga natagamtaman.

Unsaon wa man manumbaling, sa epekto sa pagpatuyang og tagay sa makahubog nga bahandi. Kay maoy anaa sa hunahuna, ang pagpahimulos alang lamang sa iyang kaugalingon. Nabutaan nga wa na kakita sa palibot, sa ubang nangamay kaniya og tabang, nga unta kabahinan sa naangkong katigayonan.

Nalimot sa gamhanang tinubdan, nga maoy nagsustiner kaniya sa kahamu-gaway. Usa ni ka misyon nga dili ka mahimong hakog, nga nakapokus dili lang sa kaayohan sa kaugalingon. Kay gihimo kang galamiton sa kahitas-an, nga matubag usab ang mga panginahanglan sa ubang nagmakiluoy sa pag-ampo.

Busa, i-ampo sa Dios, kun itugot madato sab kita sa tanang butang, i-apil ang kasingkasing nga himuong hamugaway kini, nga abli kanunay sa pagka- manggihatagon. Kay ang pagtabang, makapalungtad kini sa atong bahandi.