Ang solar power (1)

Ang pagmugna sa 'Solar Power,' 15 na ka tuig ang nakalabay, wala kaayo ni makakombinsi sa demanda sa paggamit ini, tungod sa kamahal nga dili pa sab nato kaayo komon nga makita sa kamerkadohan, nga portable'ng gamiton.

Apan karon, naa na'y daghang baligya sa mga tindahan og aplayanses, bisan sa mga nagbaligya'g asesorya sa panimalay. Nindot kaayo ang pagkadisple, kay makita man nimo ang kompleto'ng sistima sa 'Solar Power'. Ma-enganyo ka gyud sa paggamit, kay pwede ka man makasulay sa ginagmay mo'ng panginahanglan, nga komportable kaayo'ng gamiton.

Hinuon wa kaayo ni nato natagad niadto, nga naa na ni sa mga personal nga gamit sama sa 'calculator', relo, ug uban pa. Tingali nakamatikod ta's mga modelo nga may 'optional switch power', apil na niana ang 'solar power'. Nga kun wa'y kuryente o baterya, imo lang ibanta'ng kargahan sa adlaw moandar na.

Sa pagsuga, sagad nagsalig kita sa kuryente nga gipadagan sa mga dagkong planta nga gipaandar sa krudo o 'fossils fuel' o 'charcoal' (uling), nga nagbuga'g hugaw nga aso'ng itom sa kalikopan.  Sa laktud, apektado ang kahimsog sa atong panglawas. Gawas pa mahasol ta, ilabi na'g magrasyon na nga kanunay mag-brawn-awt, daghan sab ang mangadaut nga aplayanses.

Bisa'g naa ta'y kuryente gikan sa planta, mahimo na kita magpa-instalar og 'Solar Power' nga may 'optional' o 'automatic switch'. Nga pwede sab i-manual, kun unsa'y 'power' gustong gamiton - 'electric o solar'. Kun gusto nga makadaginot  sa bayranan sa kuryente, mag-'solar' nga ireserba ang kuryente. Nindot kini, kay imbis makalitan kita sa 'brown-out', komportable ni nga kita na ang magbuot kanus-a nato gamiton ang kuryente, tungod sa lain mo nga tinubdan sa enerhiya nga nakamuntar sa balay nga mao ang 'Solar Power'.