Paghimulso sa kandidato

Bisan kun wala pay campaign period, sa motuo ta o sa dili ug bisan sa pagpangulipas sa mga mokandidato pa, apan nangampanya na gyud sila. Ang mas nakabentaha sa sitwasyon mao ang mga incumbent nga mga opisyal tungod kay matuhog nila ang pagpangampanya sa ilang "panerbisyo" diha sa pagsuroy o pagdawat sa daghang mga imbitasyon.

Alang sa mga dili incumbent ang pagpa-interview sa media ang ilang puhonan aron maila ug mahibaw-an sa mga botante kinsa sila ug unsay ilang mga plataporma, kana kun aduna man.

Busa dili na ikatingala nga karon pa lang, daghan na sa mga mokandidato ang magpa-interview, ang kadaghanan ilabi na sa ilang mga handler maoy mamugos nga ma-interview ang ilang mga kandidato. Bisan kun wala’y klaro nga plataporma dali-dalion sa ilang mga handler o sa ilang public relations ang paghatag kanila og mga adbokasiya.

Ang ubang adbokasiya mahimong nahibaw-an ug nasuhito ang usa ka mokandidato. Apan adunay ubang handler nga wala’y klaro nga research busa taphaw o di ba kaha, sayop ang mga kasayuran nga ilang mahatag ngadto sa ilang mga kandidato. Tingali mao ni nahitabo sa interview sa aktres nga si Alma Moreno.

Nahimong sumsuman o viral sa social media ang interview ni Alma sa programang HeadStart ni Karen Davila sa ANC.

Si Alma usa sa mga senatorial aspirant ubos sa ticket sa United Nationalist Alliance kon UNA, ang partido ni presidential aspirant Jejomar Binay.

May mga naluoy nga nagtan-aw ni Alma nga nagbunga-bunga sa pagpanubag sa mga pangutana ni Davila. May mga nahimuot samtang ang uban naglagot ug nakasaway sa matang sa pinangutan-an ni Karen.

Tan-aw sa uban, sama sa giduot ug gipakauwawan ni Davila si Alma tungod kay wala na magkadimao ang iyang mga tubag sa daghang issues nga gipangutana kaniya, gikan sa  Reproductive Health Law, same sex marriage hangtod na sa Bangsamoro Basic Law. Dunay mga higayon nga makita sa TV nga mosimang ang panan-aw ni Alma sa iyang mga kauban nga dili makita sa camera, matag higayon nga wala siya’y klarong matubag sa mga pangutana ni Karen Davila.

Sa paningkamot nga dili hingpit mauwawan, nagpakamatinud-anon si Alma nga niangkon nga dili siya suheto sa isyu ug kinahanglan pa siyang motuon niini.

Butang nga wala hingpit mapangandami ni Alma ug sa kinatibuk-an sa iyang team nga nipadasdas kaniya sa panggubatan nga wala’y igong panagang ug bawon.

Diha sa mga interview makita ug mahibaw-an kinsa ang mga politiko nga dunay klarong research ug suheto sa isyu, nakahibawo sa iyang buhaton, dunay klarong plataporma, makamao ug dili kutob lang sa pagarpar, namakak o gidiktahan lang sa iyang mga handler.

Hinaot nga dili ra unta diha sa mga interview nga atong mahashasan ang mga politiko, samtang molihay sila sa mga debate ug ubang kahigayonan nga mapangutana o mapulsohan sa ilang tinuoray nga tumong sa pagpapili sa bisan unsang posisyon.