Hangtod Disyembre 10

Gibasura kagahapon sa Senate Electoral Tribunal ang kasong diskuwalipikasyon batok kang Senador Grace Poe. Ang SET mituo sa argument ni Poe nga bisan sa iyang pagka-kinit-an nga bata nga bisan wala mahibaw-i kinsay iyang mga ginikanan, usa gihapon siya ka natural-born nga Pilipino.

Kining desisyon sa SET walay epekto sa kasong pagpa-disqualify ni Poe isip kandidata pagka-presidente.

Ang kaso nga gisang-at ni David usa ka quo warranto proceedings diin ang usa ka tawo mahimong mokuwestiyon sa tinubdan sa gahum sa naglingkod nga opisyal. Kun dawaton ang petisyon, mahimong palagputon sa katungdanan ang gikiha.

Sa laing bahin, ang giatubang ni Poe sa Commission on Elections usa ka pre-proclamation controversy nga nagkuwestiyon sa iyang kuwalipikasyon isip kandidata (dili isip na-elect nga opisyal). Kun dawaton sa Comelec en banc ang petisyon, papason sa balota ang ngalan ni Poe isip kandidata pagka-presidente sa 2016. Dako-dako kining problema ni Poe sa Comelec kay nagkuwestiyon kini sa iyang pagka-Amerikana sanglit mibiya man kini sa Pilipinas aron mouban sa iyang bana didto sa Estados Unidos ug nakakuha og American citizenship. Pagkamatay sa nagsagop niya nga si Fernando Poe Jr. miuli ug pagkahuman gitabangan ni Presidente Noynoy Aquino nga mahimong tsirman sa Movie Television Review and Classification Board ug sa 2013 gitabangan sa Liberal Party nga mapiling senador.

Wala niya panumbalinga ang utang kabubut-on kang Noynoy, mipatuo siyang Chiz Escudero ug midagan batok kang Mar Roxas, ang kandidato sa LP.

* * *

Sa kalayo sa Disyembre 10 aron maka-substitute og kandidato ang mga partido, daghang balita nga nanggawas. Sama pananglit ni Mayor Digong Duterte sa Davao nga matud mopuli ni Martin Diño. Pero nagkamingaw og anam ang panawagan alang kang Digong. Sa unang distrito, adunay libak nga giingong magbaylo silang Eddie Gullas ug apo nga si Samsam Gullas, si Ediegul sa distrito, si Samsam sa Talisay. Apan gipanghimakak na kini sa mga Gullas, ilabi na ni Ediegul.

Pero sa Mandaue, mituyok ang balita nga si Mayor Jonas Cortes mo-substitute kang Carlo Pontico Fortuna pagka-bise mayor sa Mandaue. Segurado gyud hinuong modaog pagka-bise mayor si Jonas kun madayon kini. Pero mosugot ba diay ang mga Andaya nga mapilde ilang manok nga si Beethoven nga maoy tandem sa kandidato pagka-mayor nga si Lolypop Ouano-Dizon?

Ang kaatbang ni Jonas mao si Dr. Paulus Cañete. Kagahapon ra ba, nakadungog ko sa radyo nga gipasirad-an ni Jonas ang FM radio station ni Cañete nga DyPC. Ngano man, hadlok si Jonas kang Cañete? Ini’g kampanya, si Cañete ra gyud maoy mosabwag sa kabanga ug mga palpak sa liderato ni Jonas.

Kuyaw pa hinuon kun maapil og sabwag ni Cañete ang pagkalambigit ni Kongresista Luigi Quisumbing sa mga peke nga NGO ni Janet Lim-Napoles diin didto gibubo ang iyang pork barrel.