EDITORYAL - Maayo pud unta ang serbisyo

Pagkahayahay sa mga kawani sa gobiyerno kung mahingpit nga maaprubahan ug mamahimong balaod ang House Bill 6268 o ang Salary Standardization Law of 2015 tungod kay nangahulogan kining mosaka na ang suholan sa mga kawani sa gobiyerno.

Ang suholan sa nagserbisyo sa gobiyerno gibase sa "salary grade" nga diin ang kinaubsan mao ang salary grade 1 ug ang kinatas-an mao ang salary grade 33 nga mao ang sa presidente sa nasud.

Ang ilang suholan magkasaka sud sa upat ka tuig. Nagpasabot kini nga pwerteng hayahaya gyud sa mga makatrabaho sa gobiyerno karong mga panahona ilabi na kadtong mga anaa sa elective positions ug kadtong regular nga kawani nga naa sa nagkadaiyang ahensya.

Samtang tuod kinahanglang patas-an na ang suholan sa mga kawani sa gobiyerno kay kataposang gipatas-an ilang suholan niadto pang 2009 dihang gipagawas ang Joint Resolution No. 4.

Sa pagkatinuod, daghan ang wala kaayo mohatag og importansya sa "public service" tungod kay pirme man silang maduhig sa politika ug nalambigit sa mga kurapsyon.

Usa sa mga rason kaniadto nganong dili kaayo ganahan ang mga tawo manarbaho sa gobiyerno mao ang kagamay sa sweldo ug palakasan system ug dili tungod sa imong nahibaw-an.

Apan kung buot huna-hunaon, ang gobiyerno maoy kinadatoan, kinalig-onan nga kompanya sa usa ka nasud. Dili kini malugi ug dili manira bisan makapila pa mag-ilis og presidente.

Unta pinaagi niining usbaw sa suholan daghan na ang madasig pa nga manerbisyo sa gobiyerno.

Ilaha usab untang ayuhon ang ilang serbisyo ug wagtangon na ang mga bati nga sistema nga maoy hinungdan nganong dunay matintal  nga kawani nga mangurakot.