Padugang sa pusta si Duterte

Nabasa nako sa nasudnong pamantalaan ang gisulti ni Davao City Mayor Rodrigo Duterte nga posibling mapugos siya sa pagpapili pagka pangulo sa nasud tungod ug alang sa mga kabus. Dili na ko matingala niining maong pamahayag sa mayor tungod kay ako nang nabasa ang iyang mga pagdilidili sa pagdagan sa pagka pangulo bisan sa awhag sa iyang mga dumadapig nga padugang lamang sa pusta.

Ang problema lang ron sa mayor, dugay rang nahuman ug milabay ang adlaw nga gisita sa Comelec alang sa pagduso sa kandidatura niadtong mga mokandidato sa nagsingabot nga eleksiyon. Seguro moingon kamo nga puwede pa ang mayor tungod kay puwede pa nga mailisan ang kandidato kay ubos sa atong Omnibus Election Code puwede man ang substitution of candidates ug ang Comelec nag-ingon nga kutob pa sa Decembre 15 kun wala ko masayop ang kataposang adlaw sa pag-ilis og kandidato.

Ang problema, ang kapartido sa mayor nga miduso sa iyang kandidatora sa pagka pangulo sa Pilipinas mibakwi niini busa wala na siya sa lista sa mga kandidato sa pagka pangulo.  Obus sa Omnibus Election Code sa Pilipinas ang pag-ilis og kandidato gitugot kun ang kandidato namatay, na-disqualified ug mibakwi sa iyang kandidatora ug ang mopuli sa mibakwi kadto lamang kapariho niya og partido.

Ang mga eksperto nag-ingon nga ang paghulip sa mibakwi nga kandidato kinahanglang dungan sa pagbakwi ug kun dili man mosunod dayon. Mao ni ang problema sa mayor kun mopuli siya sa iyang kapartido nga mibakwi sa kandidatora niini sa pagka pangulo sa nasud kay makiglalis pa unya siya sa Comelec ug sa iyang mga kaatbang sa eleksiyon aron dawaton ang iyang substitution.