EDITORYAL – Serbisyong way ayo

Namatay ang usa ka kapin pa lang usa ka tuig nga batang babaye diha sa Minglanilla District Hospital tungod kay wa kuno sila tagda kay wala sila makapalit og tambal nga gireseta sa doktor.

Hain na man ang gipangangkon ni Gov. Hilario Davide III nga libreng serbisyo, libreng tambal, pag-upgrade sa mga district hospitals ug unahon gyud ang serbisyo ug dili ginansya.

Ang serbisyo sa public hospitals nagpasabot ba gyud nga ang "tanan" apil ang mga kabus tabangan? O basin kutob lang kini sa press releases.

Kay nganong wa man kini mabatyagi sa inahan ug apohan sa pasyenteng si Mary Jane Bariquit. Ang bata nagsuka-kalibang dihang gidala sa maong pangpublikong tambalanan kay P200 ra ilang kwarta.

Imbes nga hupayon ang ilang kagul-anan, gikatahong giabog pa hinuon sila sa mga hospital staff kay wala nila napalit ang giresetang tambal.

Dihang napalit na unta ang tambal pinaagi sa pagtabang sa duha ka manag-uyab nga naluoy sa bata wa pud mapusli kay wa man makita sa taga hospital ang ugat nga maoy turokan sa maong tambal. Ang nahitabo sa pamilyang Bariquit may pagka-parehas sa paid advertisement batok sa gihulagway nga "way ayo" nga serbisyo sa mga public hospitals sa lalawigan karon nga ginegosyo na man hinuon.

Hain na man diay ang gipasiatab sa gobernador nga "Point of Care Program" sa PhilHealth nga giimplimentar usab sa lalawigan?

Nasayran nga kinahanglan pa man diay magpa-enroll niini ang mga kabus una pa sila makabenepisyo. Unsa may kapuslanan niini sa mga kabus kun wala sila makapa-enroll? Sa ato pa kung di makapa-enroll dili maka-avail sa programa?  Ang enrollment diay maoy basehan ug dili ang estado sa pasyente?

Daghan og maayong mga programa ang gobiyerno apan kutob lang gyud sa estorya ug sa papel ug paghisgot sa kadako sa pundo alang niini.

Apan way seryosong milihok aron mapuslan sa mga tawo nga maoy gitaganaan niini.