Kinsay mabulahan?

Walay hunong ang panawagan asa na ang P90 bilyones nga pundo alang sa rehabilitasyon sa Tacloban human moigo ang bagyong Yolanda. Daghan usab ang nangita asa na ang mga foreign aid alang sa Tacloban ug sa ubang mga lugar sa Kabisay-an nga naigo sa Yolanda.

Duha pa ka tuig ang nakalabay human miigo ang bagyo. Ug dili kini bastabasta nga bagyo kay kinakusgan kini sa mga nangaging bagyo sa tibuok kalibutan. Walay maayong laki nga gobiyerno nga sa usa o duha ka tuig, barug na ang tanan daw walay nahitabo.

Dili kini paglaban sa gobiyerno kining ako tungod sa daghang lapso nga nahimo, apan bisan nako og tuwadtuwad sa situwasyon, dili man gyud mahimong ibubo dayon og hurot ang pundo. Ang punto mao nga duha pa ka tuig sukad ni Yolanda, nagsige pa ang rehabilitasyon.

Kun anaa ra sa bangko ang kuwarta, maghuwat kita unsa gyu’y angay gamitan niini. Magbantay hinuon kita nga dili kini makawat.

* * *

Ang P226 bilyones nga gidusong gamiton sa pagpa-usbaw sa suholan ug bonus sa mga kawani sa gobiyerno  makatabang sa pagpa-ursa sa kandidatura sa administration party nga Liberal.

Adunay 1.53 milyones ka mga kawani ang gobiyerno, apil na niini ang mga unipormadong kapolisan ug kasundalohan. Sa interbiyu sa telebisyon, nagmaya ang mga opisyal ug mga rank and file nga mga kawani sa nagkadaiyang ahensiya tungod niining bag-ong standardization law nga giduso ni Presidente Noynoy Aquino. Ang mga magbabalaod naglumpayat usab sa pagdali og tuki niini.

Tungod sa reporma sukad milingkod si Noynoy, daghang mga kawani sa gobiyerno ang nangasuko kay nawad-an sila og pamaagi nga makakurakot. Gani, daghang gipang-sampolan sa Ombudsman. Tungod niini, naduhig si Mar Roxas sa kalagot nila sa administrasyon ni Noynoy.

Ning maong kalamboan, ang mabulahan nga presidentiable mao si Roxas.

* * *

Gipakadako sa kampo ni Mayor Mike Rama ang tipping fee alang sa paglabaw sa basura ngadto sa pribadong labayanan sa Consolacion nga hinungdan sa ilang pagduso sa P3.32 bilyones nga Supplemental Budget.

Ang tipping fee kada tonelada moabot og P1,500. Busa, P81 milyones alang sa tipping fee para sa Septiyembre ngadto sa Disyembre ning tuiga.

Nakugang ko sa kadako sa tipping fee. Apan ang nahibudngan nako nganong ihapit pa sa usa ka pribadong "transfer station" sa Inayawan ang basura una dad-on sa Consolacion.

Nganong gusto man gyud ni Mike nga ihapit sa pribadong transfer station sa Inayawan ang basura sa dili pa dad-on sa Consolacion? Dili ba ang mga Ignacio ang nanag-iya sa maong transfer station? Asa man nga line-up pagka-konsehal si Lotlot Ignacio?

Pananglit ang basura gikan sa Mabolo, bisan ang basura nga anaa sa Carbon nga hilabihang daghana, ihapit gyud sa Inayawan?