Dili diay haniti

Magkuha og duha ka consultant si Gobernador Hilario Davide III alang sa pagtukod sa 12 ka andana nga building sa Kapitolyo ug para sa plano sa pagtubag sa mga katalagman. Matud ni Atty. Winston Garcia ang bayad sa consultant sa magkantidad og 800 milyones ka pesos nga building mobalor pod og 57 milyones ka pesos samtang laing 26 milyones para sa plano sa katalagman.

Kun imong sabton sama ra sa giingnan ni gobernador Junjun Davide ang Provincial engineering ug ang pangulo sa disaster sa lalawigan nga si Tribunalo nga mga banga ug dili makamao.

Aron makadaginot kay daginotan man ning atong Gobernador sa lalawigan sa Sugbo, tangtanga nang imong mga enhinyero ug si Tribunalo gobernnador unya ilisi og makamao aron dili na ka magkinahanglan og mga consultants.

* * *

Sigun sa pagtoon mas maayo nga motrabaho ang mga driver sa bus kun sila nagdawat og suweldo. Mao ni ang gibasihan ni Atty. Francis Tolentino usa ka safety advocate sa iyang sugyot nga mas maayong suweldohan ang mga bus driver ina kay hatagan lamang og commission sa ilang matag biyahi.

Ang mga driver ug konduktor mga empleyado sa tag-iya sa bus nga ilang gimaneho busa angayan lamang ug matarong gayod nga hatagan sila og suweldo ina kay komisyon lamang. Dinhi atong giduso ug gipalig-on ang maayong relasyon sa tag-iya sa bus, driver ug konduktor ug kaluwasan sa mga pasahero. Busa uyon ko sa sugyot ni Atty. Francis Tolentino.