Determinasyon ug kakugi

Ang bisan unsang hagit ug mga pagsuway sa kinabuhi, bisan unsa ka lisud kun may kakugi ug determinasyon, siguradong imong maangkon ang

kalampusan. Kini gipamatud-an sa 30 ka batan-ong scholar ubos sa Sagip Kapamilya scholarship program. Gikan sila sa nagkalainlaing probinsya sa Rehiyon-7 nga maabot sa TV Patrol Central Visayas.

Atol sa ika-25 nga anibersaryo sa TV Patrol Central Visayas niadtong 2013, sa wala pa gitay-og sa 7.2 magnitude nga linog ang Central Visayas ug sa wala pa gikuso-kuso sa super typhoon Yolanda ang Kabisay-an, nahatagan na sa kahigayonan ang 30 ka kabus nga mga tinun-an gikan sa Sugbo, Bohol ug Negros Oriental nga makapadayon sa ilang pagtungha.

Gisugdan sila sa pagpatungha nga libre sa matrikula ug P2,000 nga binuwang allowance sa ilang pagtungtong sa second year.

Kini tungod kay sa maong ang-ang makaamgo na ang usa ka tinun-an kun unsay iyang gusto ug determinado na siyang mopadayon sa pagtungha.

Ang pipila nga nadawat sa scholarship nga nagsugod na sa third year college, gihatagan pa gihapon sa retroactive nga bayad sa ilang matrikula sa second year.  Silang tanan pulos nikuha sa kursong education. Makalolooy ang mga sugilanon sa matag tinun-an nga nahatagan sa scholarship. Sama sa kinabuhi ni Ranulfo Maestre nga taga lungsod sa Dimiao, Bohol. Wala’y klaro nga panginabuhian ang iyang mga ginikanan nga nagsalig lang sa pagpangopras, apan dili sa ilang kalubihan kun dili sa ilang mga silingan. Kun wala’y makopras, wala sab sila’y makaon.  Apan bisan sa maong sitwasyon determinado siyang makahuman sa pag-eskuwela.

Nanimpalad siya sa dakbayan sa Tagbilaran. Mamaligya og newspaper matag buntag ug motrabaho isip katabang sa panimalay sa iyang mga magtutudlo matag weekend.

Ang makita nga P200 matag semana sa pagpamaligya’g newspaper maoy iyang gamiton sa pangkunsomo, pagpalit og sabon ug ubang panginahanglan.

Sunod tuig, mo-graduate na siya sa kursong Bachelor of Science in Technology Education sa Bohol Island State University. Kandidato pa siya sa pagka-honor student. Gawas ni Ranulfo mogradwar usab ang laing mga scholar gikan sa ubang state universities sama sa Cebu Technological University ug sa Negros Oriental State University.

Sa usa ka team building activity nga gipasiugdahan sa Bantay Bata 163 nga maoy nagmonitor sa ilang pagtuon, giangkon sa mga batan-on nga nahagit ug mas nadasig pa sila nga magtinarong sa ilang pagtungha tungod sa talagsaong kahigayonan nga ilang napahimuslan.

Alang nila mas swerte silang nahatagan sa maong kahigayonan taliwa sa ka liboan pa nga susama kanilang naglisod usab sa panginabuhian apan determinado usab nga makatiwas sa pagtuon.

Isip pasalamat sa mga tawo nga nitabang aron sila makapadayon sa pagtungha ug makab-ot ang tingusbawan nga gipangandoy, ang kakugi ug

determinasyon maoy kanunay nilang bawon, bisan kun matag karon ug unya hadlaon sila sa daghang tentasyon.