Utang nga wala kabayri

Dear Atty. Divine,

Duna ko’y utang sa usa ka lending company. Ang akong principal nga nautang P6 mil. Nagsige ko og hatag para bayad kada buwan, pinaagi sa akong boyfriend, apan wa diay kini niya gibayad. Karon nakadawat ko og demand letter nga miabot na og P18 mil ang akong utang, apil na ang interest ug gitagalan ko’g 15 ka adlaw sa pagbayad. Wa ko’y ikabayad attorney sa maong kantidad ug ila ko nga gihulga nga ikiha kun dili ko kabayad. Unsa ang maayo nako nga buhaton? Mapriso ba ko kun dili ko kabayad sa akong utang sa lending company? Daghang salamat. - Genie

Dear Genie,

Ang una nimo nga buhaton mao ang paghangyo sa lending company nga i-waive ang penalty o minusan ang interest sa imong utang. Imo silang sultian nga andam ka mobayad kanila matag buwan sa kantidad nga imong ma-afford. Kun ugaling dili ka kabayad sa imong utang, magsige og tubo ang interest niini apan dili ka mapriso kay nalatid kana sa atong batakang balaod nga wa’y mapriso sa utang. Ang utang dili makonsiderar nga criminal offense busa dili ka mapriso niini gawas lang kun mo-issue ka og cheke unya mountol so mahimo ka nga makiha niana og Estafa ug kalapasan sa BP 22, apan kun wa kay gi-issue nga cheke nga miuntol, then wa kay angay’ng kabalak-an kay dili ka mapriso sa imong utang. Thanks and God Bless. - Atty. Divine

Alang sa inyong pangutana may kalabutan sa problema nga legal, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.