Leksyon sa mga langayan

Gihugpaan sa gatusan ka tawo ang mga buhatan sa Commission on Elections (Comelec) atol sa deadline sa voter's registration kaniadtong Oktubre 31.

Apan bisan pa man niini daghan gihapon ang napakyas sa pagparehistro o pagpa-biometrics.

May miawhag nga lugwayan sa Comelec ang pagpangrehistro sa tinguha nga mahatagan pa og kahigayonan kadtong gusto makabotar sa 2016 elections.

Apan mura’g dili na maliso pa ang hukom sa Comelec ug wala nay lugway sa voter's registration kay taas na kaayo ang panahon nga ilang gihatag alang niadtong gusto nga mobotar nga milanat ug usa ka tuig ug tunga.

Husto ra ang gihimo sa ahensya kay ako mismo isip tigbalita nga nag-cover sa Comelec nakasaksi gyud kun unsa ka mingaw ang ilang mga buhatan sa pagsugod pa lang sa registration.

May mga adlaw man gani nga wala gyuy bisan usa ka tawo nga nagparehistro niadtong mga panahona. Makadaghan nga miawhag ang mga election officers sa mga gusto nga mobotar o gusto nga magpa- biometrics sa pag-adto na sa ilang buhatan mentras sayo pa.

Apan nagpabungol-bungol lang ang uban kinsa kompiyansa kaayo nga makaparehistro inig abot sa "tamang panahon.” Tuod man, diha nga nagkaduol na ang deadline, diha pa nagkarara sa paglinya.

Ang uban gihulat gyud ang deadliest deadline hangtud nga na-dead na gyud hinoon ang ilang kahigayonan sa pagbotar kay napakyas na man sa ilang katuyoan pagparehistro tungod sa ilang pagkalangayan.

Kini ang leksyon nga angayan nga makat-onan sa katawhan.