Nindot nga plata porma

Nanawagan si kanhi Metro Manila Development Authority (MMDA) chairman Atty. Francis Tolentino sa mga lokal nga opisyal nga andamon ang ilang mga lalawigan, dakbayan ug lungsod sa iyang gitawag nga “metropolitanization” aron matubag ang ilang mga panginahanglan panahon sa kalamidad.

Kini ang usa sa mga plata porma ni Atty. Tolentino isip kandidato pagka senador sa eleksyon karong 2016.

Matud ni Tolentino, kinahanglan nga ang mga local nga opisyal adunay panglantaw ug pagpangandam sa mga mahitabo napulo ngadto sa 20 ka tuig gikan karon, kabahin sa pag-ayo ug pagpanindot sa kadalanan, mga kanal, paghipos sa basura ug pagtukod og lig-on nga mga edipisyo.

* * *

Nakapabor ug napabilib ni kanhi DILG Secretary Mar Roxas ang mga negosyante tungod sa iyang pagpasabot sa iyang mga plata porma de pang gobiyerno niadtong miaging semana.

Si Roxas nga maoy kandidato sa Partido Liberal alang sa pagpadayon sa Matuwid na Daan mibatbat pag-ayo sa iyang mga maanindot nga plano nga ipatuman kun siya modaog.

Wala lang niya tagsa-tagsaa sa pagladlad atubangan sa mga negosyante ang iyang plano sa edukasyon, panglawas, trabaho ug uban pa, iya pa gayud kini nga gipasabot kun unsaon niya kini pagkab-ot ug paghatag sa matag pamilya nga Filipino nga maabot ang ilang mga pangandoy.

Dinhi nakapabor si Roxas.