Unsaon pagdawat og prenda?

Dear Atty. Divine,

Dunay yuta ug kalubihan nga iprenda ngari nako sa tag-iya. Unsa may husto nga paagi pagdawat og prenda? Unsay dokumento nga among pirmahan ug unsa nga dokumento nga angayan nako nga kuhaon sa tag-iya? Kun dili siya makabayad pag-abot sa term, unsay sunod nako nga buhaton? Hinaut nga imo ko nga magiyahan sa angayan nako nga buhaton? Daghang salamat. - Joey

Dear Joey,

Ang una nimo nga buhaton mao ang pagpahimo og Real Estate Mortgage ngadto sa abogado ug pirmahan ninyong duha ug panotaryohan.

Inyong ilatid sa maong kasabotan ang mga terms and conditions ug kun kanus-a hingpit nga bayran ang iyang gihuwaman nga kuwarta. Samtang wa pa siya makabayad ikaw una ang magkupot sa titulo sa maong yuta ug imo kining iuli sa tag-iya kun iya na nga mabayran ang utang.

Kun dili siya makabayad pag-abot sa panahon, then imong i-foreclose ang property pinaagi sa pagdangop sa korte alang sa foreclosure proceedings ug ipasubasta kini, dayon ang halin maoy gamiton nga bayad kanimo. Thanks and God bless. – Atty Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.