Hinaot pa unta
Naabtan og usa ka oras human nadawat ang alarma una naablihan ang sakyanan nga may tawo sa sud sa Almendras St., Cebu City niadtong Huwebes sa buntag. Dugay ra kun itandi sa dinaliang panginahanglan pagsusi sa kahimtang sa biktima, maluwas pa ba ug gikinahanglan bang dad-on sa ospital.
Naabtan ang mga polis og tunga sa oras una nakaabot sa crime scene. Langay ra. Hawan pang kadalanan sa alas-6 sa buntag ug di ingon ana kalayo ang dapit nga nahitaboan gikan sa headquarters sa Mobile Patrol Group ug sa labing duol nga Mabolo Police Station. Naunhan pa gani ang mga polis sa mga sakop sa media.
* * *
Mas uwahi pa gyod sa kapolisan ang ambulansiya sa Basak Pardo Emergency Response (BPER) nga nabantog unta sa kapaspas pagtubag sa mga emerhensiya. Dugay ra. Ambot unsay problema. Naatlan bang nagtubag og dungan nga alarma. O angay bang magdugang ang City Hall og mga ambulansiya ug paramedics.
Gipasabot ni Konsehal Dave Tumulak, pangu sa Cebu City Risk Reduction and Management Council, nga wa dayon ablihi ang sakyanan kay gipreserbar nilang crime scene ug giseguro nga di maletratohan ang sensitibong bahin sa biktima nga mapakatap dayon sa social media. Lalisunon pa hinuon kalabwan bang panginahanglan pagluwas og kinabuhi. Gawas kun nidiretso paghukom ang mga polis ug paramedics nga patay nang biktima bisan wa pa masusing lawas.
* * *
Abtik hinuon ang mga polis pagbutang dayon og police tape palibot sa sakyanan. Apan, ambot naikog ba lang nga mahasol ang trapiko o nga maglisod paghulagway ang mga reporter o pagkuha og footage ang cameramen, giladlad nila ang police tape sa ngilit ra sab sa sakyanan.
Mao nga wa kinahanglana nga lapason ang police tape. Gawasnon si bisan kinsa nga nanguryuso sa paglili sa sud ug bisan sa paghikap sa bisan asang bahin sa sakyanan. Ambot para kamera ba lang ang yellow line, o nakalimtan lang gyod sa mga polis nga mas mahinungdanon ang pagpanalipod sa crime scene kay sa pagpasundayag sa mga ebidensiya sa tanang interesado.
* * *
Wa hinuoy ebidensiya nga nagguba. Way nangahas paglawgaw sa crime scene. Nagbantay sang mga sakop sa media sa mga anggulo sa patay’ng lawas nga ilang gipakita. Ug wa nay kahigayonan nga maluwas pang biktima kay gibanabanang 12 ka oras nang patay pagkadawat sa alarma.
Hinaot nga mas paspas na ang kapolisan ug ang City Hall sa pagtubag sa mosunod pa nga mga alarma. Hinaot nga hatagan og mas dako nga importansiya ang dinalian nga pagluwas og mga kinabuhi. Hinaot nga mas matinud-anon na nga panalipdan ang crime scene. Labaw sa tanan, hinaot nga mas mabinantayon na sa atong palibot aron nga di na kinahanglanon pa ang nahaunang mga panghinaot.
- Latest
