Conflict of interest ni Congressman Luigi

Kaniadtong tuig 2011 ug 2013, ang Kapitolyo namalit og 19 ka multicab ambuvans nga nagkantidad og tag P249,000 matag usa o sa kinatibuk-an nga P4.7 milyones nga wala moagi og public bidding sigun sa Commission on Audit.

Ang salapi nga gigamit sa pagpamalit sa mga sakyanan nagagikan sa pork barrel ni 6th District Congressman Luigi Quisumbing.

Ang maong transaksyon mihikaw sa Kapitolyo sa kahigayonan nga makadaginot tungod sa kakuwang sa bidding.

Sa report sa COA, ang 19 ka multicab ambuvans gipalit sa Kapitolyo sa kompaniya nga gipanag-iya sa pamilya ni Quisumbing.

Sigon sa taho, 11 ka sakyanan ang gipalit sa Kapitolyo sa Porta Coeli niadtong tuig 2011 sa kantidad nga P2.7 milyones samtang ang laing walo ka sakyanan gipalit gihapon gikan sa maong kompaniya pinaagi sa direct contracting sa kantidad nga P1.9 milyones.

Kining mao nga mga sakyanan gipang-apud-apod sa Kapitolyo sa mga barangay nga nahimutang sa ikaunom nga distrito sa Lalawigan sa Sugbo.

Ang Invitation to Bid sa una nga pagpalit sa mga sakyanan nga adunay approved nga gahin nga nagkantidad og P2.7 milyones wala gipublikar sa pamantalaan sigon sa nakalatid sa Republic Act 9184, ang Consumers Act of the Philippines.

Bisan tuod ang COA nag-ingon nga wala na’y kontrol sa salapi ang kongresista human niya mahatag ngadto sa Kapitolyo ang salapi gikan sa iyang pork barrel, apan dili nato malikayan ang pagduda nga adunay mga kondisyon sa pagpamalit sa mga sakyanan gikan sa kompaniya nga gipanag-iya mismo sa kongresista.

Kini ilabi na nga ang salapi nga gigamit sa pagpalit, gikan sa iyang pork barrel. Ang mga pagduda dili nato malikayan tungod kay ang kongresista usa sa mga naapil sa listahan niadtong mga nalambigit sa piki nga NGO's ni Janet Lim Napoles.

Niining conflict of interest, makalingkawas kaha niini si Quisumbing?