Pagkatalawan!

Naukay ang dakbayan sa Sugbo dihang nahitabo ang krimen nga naglambigit sa mga Chinese diplomats nga nag-unay sa pagpinatyanay sulod sa usa ka kan-anan niadtong miaging semana. Duha ang namatay ug usa ang naangol nga mao ang Chinese Consul General, samtang dali ra usab nasikop sa mga otoridad ang duha ka suspek sa krimen nga kadugo ug kauban ra usab sa mga biktima sulod mismo sa buhatan sa konsulada sa China. Apan makadismaya ang gipakita nga pagbahag sa ikog sa atong gobiyerno sa pag-handle sa kaso sa mga Chinese diplomats nga mi-amen ug miluhod dayon sa kagustohan sa nasud sa China gumikan sa giingon nga bilateral agreement tali sa Pilipinas.

Ang kasabotan mao nga dili mahimo nga pasakaan og kaso ang nalambigit sa krimen tungod kay aduna sila’y absolute diplomatic immunity. Gumikan niini ang atong kapolisan dali ra kaayo nakakambyo sa pag-ingon nga wala nila dakpa ang duha ka Tsino nga suspek kay igo lang nila nga giimbitar pag-adto sa ilang buhatan ug wala usab nila ibalhug sa bilanggoan tungod sa kahadlok nga maka-jeopardize sa national security. Saksi ang mga sakop sa media nga nag-cover sa dagan sa kaso nga subra ra kaayo ang gihimo sa mga otoridad paghatag og espesyal nga pagtagad sa mga suspek nga dili gani pakuhaan og hulagway.

Nalatid ba diay sa bilateral agreement nga hingpit mawagtangan og gahum ang atong balaod sa higayon nga mo-invoke na sa ilang diplomatic immunity ang mga suspetsadong kriminal nga Chinese diplomats?

Ibutang lang nato nga dili sila mahimong i-prosecute sa Pilipinas apan dili ‘sad makatarunganon nga bisan ang pag-blotter man lang sa nahitabo o paghimo sa naandan nga standard operating procedure sa atong kapolisan dili na mahimo?

Labaw na nga ngil-ad tan-awon nga murag gi-"baby" na man hinuon sa mga polis ang mga suspek kinsa wala ibalhug sa bilanggoan. In fairness sa atong local police, igo ra sila nagtuman sa kamandoan sa ilang ulohang buhatan.

Kun ang mga Filipino ang makahimo og sala didto sa China wala g’yuy mahimo ang gobiyerno sa Pilipinas kun sila pamatyon. Dili man hinoon mga diplomats ang atong mga kababayan nga gipamatay apan ang akong punto, subra ra kaayo ka arogante ang China nga mismo dinhi sa atong nasud sila pa ang modiktar. Karon natubag na ang akong pangutana kun ngano nga walay mahimo ang Pilipinas sa pag-angkon sa China sa Spratly Island? Kini tungod sa dako nga pagkatalawan sa atong kagamhanan.