Brgy Looc, Mandaue City
"Ang traffic enforcer sa TEAM nga nadestino diri sa may Superior kay kanunay man nga wala sa iyang puwesto. Makit-an namo siya usahay sa LTO nga nag-fixer, unya siya pud ang modala sa mga sakyanan sa emission testing center."
Brgy Bagacay, Sibonga, Cebu
“Ireklamo namo ang ubang habal-habal driver nga nagbiyahean sa among lugar kay sagol kawat ug tulis ang ilang buhaton ngadto sa ilang mga pasahero. May usa ka estudyante diri nga nahulog ang cellphone unya nakit-an sa usa ka driver pero wala gyud iuli.”
Brgy Luyang, Carmen, Cebu
“Ireklamo ‘sab namo ang duha ka maestra diri sa elementary school kay ang among mga anak nga nag-camping sulod sa tunghaan gi-padlock man sa ilang room atol sa pangatulog unya sila didto sa principal's office. Ang among gikabalak-an og basin naay sunog.”
Brgy Buaya, Lapu-Lapu City
"Grabe na man ang sugal diri sa merkado sa Saac uy, kada gabii g’yud ni’ng peryahan nga unta wala may fiesta diri. Nahibulong lang mi ngano nga wala man kabadlong ang among mga opisyal sa barangay.”
Brgy Cogon-East, Carmen, Cebu
“Naproblema mi diri sa Sitio Pasil kay ang tubig wala gyuy klaro nga agas, dugay na kaayo ni namo nga problema. Amo na man unta ni nga gireklamo sa among mga opisyal pero wala may aksyon, mura man sila’g mga buta ug bungol.”
Brgy Poblacion, Tuburan, Cebu
“Daghan na man kaayo ang naninda’g isda sa gawas sa merkado uy, luoy kaayo mi nga naninda sulod sa merkado kay wala nay mamalit sa among baligya nga unta kami may nagbayad og arkabala.”
Brgy Tisa, Cebu City
“Batia sa karsada diri sa Hills View Village uy, daghan kaayo’g lubaklubak. Asa na man ning among mga opisyal nga wala man gyud magpakabana niini?”
Brgy Poblacion, San Remigio, Cebu
“Dia may konsehal sa among barangay diri nga nagtukod og kaugalingon nga merkado nga unta naa may public market. Luoy kaayo ang mga naninda sa public market kay husto sa bayad sa buhis pero mao na hinuon ang wa’y halin.”
Brgy Malolos, Barili, Cebu
“Diri sa among barangay wala man gyuy tinubdan sa tubig sulod sa dugay na nga panahon. Wala man ‘sab gyud magtagad ang mga opisyal niini nga problema, nagsalig lang tingali sila kay daghan sila’g kwarta nga ikapalit og tubig kada adlaw.”
Brgy San Roque, Cebu City
“Naunsa na man ning among mga opisyal sa barangay nga wala man gyuy gihimong kalihukan para namo nga mga batan-on bisa’g liga na lang sa basketball o volleyball. Ambot unsay rason ngano nga napasagdan nila ang ilang obligasyon.”
Alang sa inyong mga reklamo text lang sa 09062973166
- Latest
