Ngano kanunay ta kapuyon

Ang bation sa tawo kun siya nasubra-an na sa kahago o naugtas na ang kusog, natural kini nga kapuyon o maluya na ang kalawasan ug panghunahuna. Apan ang kanunay nga gikapoy, bisa’g nakapahuway nga wala mahago, katingad-an kini nga dili na normal ang ingon aning kahimtang.

Tungod ini, angay kita magkat-on sa pagsayud kun unsa gyu’y mga hinungdan, ngano naingon niini nga permi man lang nga gikapoy. Sama sa ;

* Unsa’y gikaon mo – Sagad mao kini ang una’ng hinungdan, ang kinaiya o istilo nga nakarehistro sa utok ang pagpabusog sa pagkaon. Apan sagad wala makaamggo nga imbis nabusog na, naluya hinuon nga lugos makairog o maalsa ang lawas, nga inay mobaskog naingon hinuon sa katulgon.

* Subra sa timbang o katambok  -  Usa sab ni sa hinungdan, nga di na makasugakod ang lawas sa naghinubra’ng inerhiya’ng wa magamit nga napondo sa tambok, mao nga walay igo’ng kusog sa kabug-at, nga permi naugtas nga way gibuhat. Dili makatrabaho’g tarong ang pagsirkular sa dugo nga mahatud ang mga gikinahangla’ng mga nutreyens alang sa pagpabaskog sa panglawas.

* Kapila naka-ehersisyo  -  Gikinahanglan gayud kini, ang pag-ehersisyo kanunay alang sa pagbaton og kabaskog o kahimsog sa panglawas.  Ang paghimo ini, maoy pagpalihok sa katibuk-ang mga sistima sa panlawas nato. Aron regular nga makalihok ang  mga parte sa kalawasan aron isustener, nga kanunay kini nga anaa sa maayong kondisyon ang panglawas. Matud ni Dr. Ralston, ang pagresita niya sa mga pasyente nga anaa sa kakapoy, simple ra kaayo nga mao ang pag-ehersisyo sa paglakaw, para makarelaks sa batio’ng kahasol sa di masabot nga kakapoy. Mirekomendar siya’g 40mins labing menus 4ka beses sud sa semana. Bisa’g maayo kapa’g nutrisyon, masakit gihapon kun way ehersisyo.