Hugaw pa sa basura

Ingon niini ang sitwasyon karon sa politika, ilabi na sa dakbayan sa Sugbo nga literal g’yud nga makita ug masimhot ang kahugaw ug kabaho sa nagtipun-og nga mga basura nga wala mahipos.

Ang hinungdan niini mao ang grabe’ng pamolitika sa mga opisyal sa Cebu City kay hangtud karon padayon pa nga  gilantugian ang pagpasar sa P2.8 bilyones nga Supplemental Budget-1.

Makatulo na ka higayon nga gi-reject sa mayoriya sa konseho nga naglangkob sa Bando Osmeña Pundok Kauswagan (BOPK) ang pagtuki sa supplemental budget.

Kini bisan pa og gi-deny na sa korte ang gipangayo nga Temporary Restraining Order sa usa ka Atty. Romulo Torres nga nagpugong sa dakbayan paggamit sa kuwarta nga halin sa South Road Properties (SRP).

Mao kini ang una nga gigamit nga rason sa majority bloc sa konseho ngano nga wala nila tandoga ang isyu sa supplemental budget.

Bisan pa man sa mga argumento'ng legal nga mitumaw niini nga isyu, dili g’yud matago nga nahulog na kini sa political war sa BOPK ug TEAM RAMA sa umaabot 2016 elections.

Resulta, ang naigo sa mga bala mao ang mga yano nga lungsoranon nga maoy nahikawan sa mga batakan nga serbisyo gikan unta sa mga tawo nga gibutang sa puwesto kinsa nagpaila nga mga public servants o sulogoon sa katawhan.

Sa panagsungi karon sa duha ka politikanhong grupo sa dakbayan sa Sugbo, ang ilang mga “boss” nga mao ang mga magbubuhis maoy naipit tungod kay ang ilang basura dili na mahipos kay ang dakbayan dili na makabayad sa tipping fee nga kuhaon unta gikan sa kontrobersyal nga supplemental budget.

Ang kahugaw ug kabaho pa lang ang ato nga giproblema karon apan kun dili kini mapangitaan og paagi, sigurado nga mosangpot kini sa mas dako pa nga suliran sa epidemya sa mga balatian nga mobiktima sa katawhan gumikan sa mga kagaw nga mamugna sa mga basura.

Naproblema pa gani kita karon sa dengue, mosamot na unya kun madugangan pa og mga laing sakit nga mohugpa tungod sa wala’y pagpakabana sa atong mga opisyal kay ang giuna nila mao man ang ilang personal ug politikanhong interest.