Ayaw saguli og pamulitika

Dako nga kadaut ang gibilin ni Bagyong Lando didto sa Luzon sa niaging semana. Bilyones ang kantidad sa mga kabtangan ug inprastraktura ang gibanlas. Adunay mga lugar nga isolated karon tungod kay lisod ma-penetrate sa mga rescuers.

 Tungod sa ka kusog sa maong bagyo, pipila ka kinabuhi usab ang nakalas didto sa mga probinsiya sa northern Luzon. Gituohan nga mosaka pa ang death toll tungod lagi kay adunay pipila ang na-missing.

Sa pagkakaron, dakong bahin sa Luzon ang gilunopan sa tubig dala sa makusog nga ulan ni Lando. Gani atong makita sa telebisyon ang halapad nga tubig nga mikawat og dakong porsiyon sa kayutaan ug  mianod sa mga balay ug ubang edepisyo.

Dili man sama si Lando sa kakusog ni Yolanda, ang labing ngilngig nga bagyo nga nilapdos sa kalibotan kaniadtong 2013. Apan dili usab mabentahaan ang kadaut ug puwerhisyo nga gimugna ni Lando. Gani dili ordinaryo kadto nga bagyo.

Panahon na usab sa kagamhanan pagresponde alang sa mga biktima. Hinaut nga nakat-on og leksiyon ang mga concerned agencies ug nga paspas silang makahatod sa mga hinabang ngadto sa mga apektadong lugar.    

Hinaut nga malikayan na ang kontrobersiya nga nahitabo panahon sa paghatag og mga assistance sa mga biktima ni Yolanda dinhi sa Kabisayaan.

Dili lamang hinay ang mga ahensiya sa kagamhanan pag-aksiyon, adunay alegasyon nga kadtong mga lugar kansang mga opisyales kaalyado sa administrasyon ang adunay dakong pahat sa mga hinabang.

Karon, ilabina nga nagsingabot na ang kampanya alang sa eleksiyon sa sunod tuig, daghan ang nagduda nga sagolan na usab og pulitika ang pagpang-apod-apod sa mga hinabang ngadto sa mga biktima ni Lando.

Basin baya kun ang mga lugar kansang mga opisyales kapartido sa administrasyon maoy maprayoridad na hinuon niining mga ahensiya sa gobiyerno pag-distribute sa mga hinabang aron lagi paghakot og mga botos alang sa standard bearer sa Liberal Party.

 Basta gani panahon sa katalagman, naanad na kining ubang mga pulitiko nga mo-starring atubangan sa mga biktima alang kuno pagsimpatiya. Apan lain diay ang ilang agenda, nga mao lamang ang pagpahumot alang sa ilang politikanhong interes.