Wala ma-notarize nga Deed of Sale

Dear Atty. Divine,

Duna’y napalit nga yuta ang akong papa niadto’ng 1960. Naay Deed of Sale nga pinirmahan sa seller ug sa akong papa apan wala ma-notarize. Patay na ang akong papa ug patay na ‘sab ang nagbaligya. Pagkamatay sa akong papa ako ang mipuli sa pag-ukopar ug pag-ugmad sa yuta kay bugtong man ko nga anak. Ang akong pangutana kun balido ba kini nga maong Deed of Sale? Unsaon man nako pag-transfer sa akong pangan niining mao nga property? Daghang salamat.— Joey

Dear Joey,

Kun ang nagpirma sa maong Deed of Sale mao g’yud ang tag-iya sa yuta ug adunay mga testigo nga makapamatuod niana nga gibaligya g’yud kana nga yutaa ngadto sa imong amahan ug iyang nabayran in full ang purchase price, then makonsiderar nga balido ang maong dokumento bisan kun dili kini notarize. Basta imo kining mapamatud-an sa korte.

Apan ang imong problema ang pag-transfer kay ang BIR dili modawat og dili notarize nga Deed of Sale, dili ‘sab ka makapa-notarize sa maong dokumento karon kay patay na man ang mga signatory ug ang abogado mo-require man sa presence sa mga mipirma.

Ang maayo nimo nga buhaton karon mao ang pagpahimo og Extrajudicial Partition with Sale ug imo kini nga papirmahan sa mga heirs sa Seller then imong panotaryohan. Human niini, imong iduso sa BIR alang sa pagbayad sa Capital Gains Tax ug Documentary Stamp Tax lakip na sa Estate Tax aron imong ma-process ang pag-transfer niini sa imong pangalan. Thanks and God bless - Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.