EDITORYAL - Makamatay nga gabon

Dili na luwas ang hanging atong gihanggab karon dinhi sa Metro Cebu tungod sa nasinati nga haze o gabon nga epekto sa dakong sunog gikan sa nasud sa Indonesia.

Peligro kini matud pa ngadto sa mga adunay mga sakit sa baga ug gani ang Environmental Management Board sa rehiyon mipagawas na og pahimangno nga likayan ang paggawas-gawas kun dili importante.

Matud pa sa gipagawas nga memo sa EMB-7, naka-monitor karon ang ilang mga ekipo og 2.5 microgram per Normal cubic meter nga abog dala aning haze nga modiretso sa baga ug mosagol sa atong dugo.

Unsa man ni wa tay mahimo kontra niini gawas na lang sa paglikay nga mogawas sa atong mga panimalay bisan og naandan na nato kining gimbuhaton?

Matud pa sa EMB-7 bisan ang surgical mask dili luwas gamiton niining haze o gabon nga nasinati sa atong dapit. Girekomendar nila ang pagsuot og industrial dust mask respirators.

Hangtud kanus-a kaha kini nga ingon niini nga pirmeng nabutang sa peligro ang kinabuhi sa mga tawo ilabi na sa mga bata nga adunay problema sa baga.

Unsa may gibuhat sa atong lokal ug nasyonal nga kagamhanan aron proteksyonan ang katawhan gikan niining makamatay diay nga gabon?

 Pwerte man kamahal anang industrial dust mask respirators ug dili na makaya sa mga kabus natong kaigsuonan, makaluluoy niini ang mga batang kabus kay mas importante baya ang pagkaon imbes nga dust mask.

Hinuon, maayo na lang ni kay nihatag og abiso ug pahimangno ang EMB-7 kay makabantay ang publiko ug makahimo og mga pamaagi aron malikayan nga di masakit niining gabon.

Ang gobiyerno ug ang mga lokal nga kagamhanan kinahanglang mohimo na karon dayon og mga lakang aron matabangan ang mga tawo nga mas nagkinahanglan niini ilabi na kadtong gikan sa mga kabus nga lugar.