Pagyukbo kang Sir Jabat

Sa akong pagtagik ning maong pamalandong ako nagsubo nga nasayud sa kamatayon ni Sir Juanito Jabat. Kini si Sir Jabat buotan kaayo nga tawo kay sa akong pagtungha pa lang kaniadto sa seminaryo matag kita namo sa opisina ako mohapit gyud sa iyang opisina. Daghan kaayo siyang gitudlo kanako mahitungod sa pagsulat mura bitaw og practical journalism. Apan ang di gyud nako hikalimtan mao nga sa dihang ako molakaw unta duna siya'y gamay nga sobre nga gihatag uban ang gasa ug sulat nga nagpasalamat siya sa Ginoo nga nahimo siyang kabahin sa akong panaw sa pagkapari. Dako niyang kalipay nga nahuman ko akong pagtungha sa seminaryo ug nahimong kabahin sa akong kinabuhi ang Banat News. Lantip nga tawo, mapaubsanong pangulo, akong tinamod nga amahan. Kun asa ka man karon, sa mga misa ug pag-ampo ikaw hinumdoman kuyog ang pagpasalamat nga imo akong gimatuto aron higugmaon ang pagtagik diha sa pamantalaan. Pahulay nga dayon ihatag kang Sir Juanito Ginoo ug ang imong kahayag modan-ag kaniya hangtud sa kahangturan. Amen.