Pagsanta sa kahadlok

Wala’y tawo nga dili bation og kahadlok, kay kabahin man kini sa atong pagkatawo. Ang atong pagkahimugso ni’ng kalibutana, aduna ma’y kaluha ang kalipay, nga may mga elemento sa pagkahadlok nga mao ang duda ug kabalaka.

Kun kini mao’y himuon nato’ng pundasyon sa kinabuhi, kalagmitan mao sab kini ang nag-una’ng hinungdan  nga dili kita makahinultol sa angay buhaton. Aron mapalambo nga malinawon ang unsa ma’y atong panglantaw, nga mohatag og kaseguroan sa atong paglaum. Kinahanglan maantigo kita sa pagsanta ini nga dili mogamot ang pagkamahadlukon sa pagdawat. Motalaw nga way pagsulay, bisan kini mahimo sa kasayon, kay mipasulabi ang kahadlok basig mapakyas.

Ang atong ginikanan, kun wala pa sila’y kaisog nga ihimugso kita, wa unta kita karo’y kinabuhi, di ba? Kay ila man gihingusgan, ang positibo nga maangkon ang ilang pangandoy, ang bunga’ng makalipay taliwala sa kalisdanan. Mao usab ang angay gayud nga dili kita paulipon sa kahadlok, kay momugna lang ni’g kanunay nga anaa sa kadismaya nga maabtan sa panahon nga igo na lang sa pagmahay. Hangtud nga maapektahan ang panglawas nga naghambin og makaugtas nga balatian. Nga ning sitwasyona, mosamot mohari ang kahadlok.

Sayon ra ang pagsanta sa kahadlok, nagkinahanglan lang nga maantigo ka sa pagdawat sa kamatuoran, nga wala’y usa kanato nga dili moagi sa kapakyasan sa di pa nato hingpit makab-ot ang gitinguha’ng kalampusan. Mao ni kanunay itisok sa panghunahuna nga ang kahadlok makaayo kini kun himuon natong panagang o panagana nga adunay katakos sa pagkorehir nga ipadayon hangtud magmadaugon. Way di nimo mahimo, magmaisogon ka’s pagsanta sa kahadlok. Di sab mokompiyansa, iseguro ang pagpangamuyo sa Kahitas-an, nga palig-unon ka’ng way kukahadlok sa pagsuong nga molahutay sa pag-antus.