Duwa sa pulitika

Nagkagrabe na kining pulitikanhong panagbingkil tali sa executive department ug sa konseho sa dakbayan sa Sugbo. Ug wala koy nakitang daling solusyon niini ilabina nga nisangko na sa korte ang maong kagubot.

Sa niaging mga adlaw, niulbo ang protesta sa City Hall sa dihang nag-rally ang mga empleyedo sa city government gumikan sa pagdumili sa konseho pag-aprubar sa P2.8 bilyones nga supplemental budget 1.

Apil sa maong supplemental budget ang productivity enhancement incentives sa mga empleyado sa City Hall. Ug kuyaw nga dili kini nila madawat karong tuiga tungod kay giyak-an pa man sa konseho ang SB 1.

Ug gumikan sa pagkatanggong sa SB 1 diha sa konseho karon, siyam ka sakop sa Bando Osmeña Pundok Kauswagan ang nag-atubang karon og kaso nga gipasaka sa tulo ka concerned citizens sa Office of the Ombudsman-Visayas.    

Klarong duwa sa pulitika kining mga kasikas sa City Hall karon. Tungod kay dehado siya sa mga tawo sa konseho, dili ka ugpo si Rama sa iyang mga programa ug proyekto, ilabina kun adunay dakong salapi ang malambigit.

Apan tungod lagi kay isig palabwanay sa rason, walay nidaug niining duha ka kampo. Mao nang mismo ang mga Sugboanon maoy napagan ug ang dakbayan naalkansi gumikan lagi kay gihikawan sa maayong serbisyo.              

Sa akong tan-aw, ang solusyon niining maong problema ato lamang makita sa balota sa Mayo sa sunod tuig. Apan sa kondisyon nga sa resulta sa eleksiyon, kinahanglan nga ang modaug pagka-mayor adunay mayoriya usab sa konseho.

Kay kun dili gani, nan magpadayon gayud kining maong problema diha sa City Hall. Sama niining naulahing termino ni Rama nga pulos pulitikanhong panagbangi ang midominar sa duha ka departamento tungod sa pagkabuak sa Konseho.

Hinuon kabahin kini sa nagtuyok nga himsog nga demokrasya diin libre ang tanan sa ilang mga diskarte diha sa hawanan sa Konseho. Apan mao lagi, sa sige nga pamulitika sa uban, ang katawhan na hinuon ang mapuwerhisyo.