Tommy pabiling himsog

Ang mga hunahuna nga gipadayag dinhi iya ra sa tagsulat ug wala’y labot ang Banat News ug mga sakop niini.

Sa miaging Sabado, gihagad ko ni Melody Victoria, kauban ko sa trabaho, nga moadto sa South Road Properties (SRP) kay mamalit kuno’g utanon ug mga abot sa mga mag-uuma.

Dinhi giladlad ug gibaligya sa mga mag-uuma ang ilang mga abot sa kaumahan aron ang mga lumolupyo sa siyudad, kinsa kanunay mahiagom sa kamahal sa mga palaliton diha sa mga grocery stores, makapahimulos og barato nga presyo.

Gani bisa’g nagsige na og us-os ang presyo sa gasolina, ang mga inadlaw’ng palaliton nga gikinahanglan sa tawo nagpabiling mahal gihapon.

Si Melody ug ubang mga higala sa trabahoan, mga health conscious. Hinungdan, nga hilig mangumpra’g utanon ug mga prutas.

Mao nga wala makaipsot sa ilang panan-aw ang talagsaong proyekto nga gipasiugdahan ni kanhi mayor Tommy Osmeña nga gi-post g’yud sa Facebook ug nahimong viral.

Pipila kanila, nagpakuha pa’g hulagway uban ni Tommy diha nga tayming nga nagkaabot sila sa maong dapit -- Ang Tabo sa SRP, nga kada adlaw na.

Kini nagpasabot lang nga aktibo gihapon si Tommy isip sulugoon sa siyudad ug sa katawhan. Iyang gipakita nga bisa’g dili na siya mayor andam gihapon siya nga mosilbe sa mga lungsoranon ug siyudadnon diha sa mga pamaagi nga sulundon ug mapuslan sa kadaghanan.

Tinuoray, klaro man kaayo nga kining gibuhat ni Tommy adunay hait nga tumong -- ang pagpalambo sa agrikultura ug ang pagpadayon niadtong gikamingawan niya nga bulohaton nga mao ang pagpauswag pa pagsamot sa Sugbo. Ang pangutana mao: “Mahal pa ba siya sa katawhan?”

Si Tommy ug Mike suod nga managhigala kanhi. Diha nga si Tommy ang mayor, si Mike maoy bise-mayor. Dugay ang ilang panag-uban sa City Hall.

Nabiyaan lang niya ang City Hall diha nga nasakit siya’g kanser, diin ubos sa pangagpas ning tagsulat maoy nakahadlok sa pipila ka botante sa pagboto kaniya.

Apan gideklarar sa ospital sa Amerika nga hingpit na nga naayo si Tommy sa iyang sakit ug kining iyang pagpakita sa padayon niya nga pagpanerbisyo sa katawhan karon, nagpaila lang nga si Tommy pabiling himsog.