Brgy Paypay, Daan Bantayan, Cebu

"Grabe na g’yud kaayo ang abuso sa ubang mga mananagat diri sa among lugar, labi na sa mogamit og dinamita kay nagpataka na lang pagpaniro. Gani bag-o lang may namatay nga diver kay gilabay sa dinamita kay nagtuo nga mga isda ang nagburoburo sa dagat. Unya ang usa sa mga suspek miangkon na nga kuyog siya sa pagpaniro.

Concern lang ko ani nga reklamo kay kun magpadayon kini nga ilegal nga panagat gamit ang dinamita, basin og daghan pa nga kinabuhi ang makalas tungod sa pagpabaya sa uban. Gawas nga ilegal ang maong matang sa pagpanagat, delikado kini sa mga maligo sa dagat.

Unta mahatagan ni’g aksyon sa mga opisyal sa lungsod sa Daan Bantayan ug sa kapolisan mismo aron mahunong na kining klase sa ilegal nga panagat kay mura’g napasagdan na man lang ni diha sa maong lungsod.

Brgy Ibabao, Cordova, Cebu

"Grabe na g’yud kaabusado sa mga dispatcher diri sa mga PUJ kay masuko kun hatagan og gamay bisa’g usa ra ka pasahero ang mosakay. Maayo unta’g mabadlong ni sila kay kun dili nimo mahatagan baharan mi nga mga driver nga ilang birahan."

Brgy Tipolo, Mandaue City

"Taudtaud na g’yud nga wala’y klaro nga pagkuha sa mga basura diri sa among lugar, baho na kaayo ang mga basura. Agi-agian ra man ang mga basura diri sa mga garbage collector kay siguroon nila’g kuha kadtong sulod sa subdivision nga mohatag nila’g kuwarta."

Brgy Jugan, Consolacion, Cebu

"Uso na kaayo ang pagpangawat diri sa among lugar. Ang mga kawatan manaka og mga balay kun wala’y tawo. Sige nami og reklamo ngadto sa mga polis pero wala man g’yuy aksyon nga gihimo kuyawan mi kay basin kun manghilabot ni sila’g mga tawo nga naa sa balay atol sa ilang pagpangawat."

Brgy San Roque, Cebu City

“Wala g’yud ni mabadlong ning mga dispatcher diri atbang sa Cathedral nga abusado kaayo, sige lang panghingi namo nga mga driver. Ang uban ani nila kun makalugar manglabni sa mga butang ug alahas sa mga pasahero, maayo unta’g naay ibutang diri nga mga polis kay aron madakpan ning mga tawhana.”

Brgy Jaclupan, Talisay City

“Dili g’yud ni masumpo ang ilegal parking diri sa among lugar kay mismo ang kapitan diri mao may tag-iya aning mga dagko nga truck nga giparking daplin sa karsada. Kuyaw man gud kaayo sa ubang sakyanan nga moagi diha kay gamay na lang ang agianan unya naa pa g’yud i-parking bisa’g sa kurbadahon nga karsada.”

Alang sa inyong mga reklamo text lang sa 09062973166