Usisaha ang mga kandidato

Sigun sa Comelec Resolution No. 9982, adunay 18,069 ka posisyon ang malansaran sa nagsingabot nga piniliay sa Mayo 2016.

Kini gilangkoban sa usa ka presidente, ug usa ka bise presidente sa nasud, 12 ka senador, 58 ka party-list nga kongresista, 235 ka kongresista sa mga distrito, 81 ka gobernador, 81 ka bise gobernador, 772 ka sakop sa hunta probinsiyal, 144 ka mayor sa dakbayan, 144 ka bise mayor sa mga siyudad, 1,610 ka konsehal sa dakbayan, 1,490 ka mayor sa kalungsoran, 1,490 ka bise mayor sa kalungsoran, 11,924 ka konsehales sa kalungsoran, usa ka gobernador sa Autonomous Region of Muslim Mindanao, usa ka bise gobernador sa ARMM ug 24 ka mga Assemblyman.

Ingon ani ka daghan ang atong pilion sa umaabot nga election ug pil-on usab sa makadaghan ang maong gidaghanon sa mga pilianan base unya sa kadaghan sa mga kandidato nga nagsugod na sa pagduso sa ilang mga certificate of candidacy kagahapong adlawa.

Busa magsugod na kita sa pag ila-ila sa mga kandidato nga misumiter sa ilang application kanato mentras tanto nga aduna pa kita’y igo nga panahon sa pag-ila kanila.

Gawas sa pag-ila-ila kanila, sutaa pud ninyo ang ilang mga plano o programa de gobiyerno kun sila makadaog ug mapili sa umaabot nga piniliay.

Hinumdomi ninyo ang piniliay nga dili tiaw-tiaw ug dili duwa-duwa. Mahinungdanon kaayo kini kanato tungod kay ang ugma sa nasud, lalawigan, dakbayan, kalungsoran ug kabarangayan bisan sa Oktobre pa ang piniliay sa barangay, nakasandig kanila nga atong ibutang sa mga katungdanan nga ilang gidaganan.