EDITORYAL - Hagit sa Amerika

Nagpaabot ang kalibotan ilabi na ang mga nasud sa Southeast Asia sa sangputanan niining bahad sa China nga babagan niini ang bisan unsang barko o abyon sa Amerika nga molawig o molupad duol ug ibabaw mismo sa mga artipisyal nga isla nga ilang gihimo.

Ang Amerika nakaamgo ra gyud sa kataposan nga kuwang ra ang gipakita niining aksyon sa nangaging mga buwan pagpamatuod nga wala nila ilha ang pangangkon sa China sa tibuok West Philippine Sea. Una nang gisaway ang pamahayag sa usa ka opisyal sa Amerika kabahin sa pagbutang niini og limitasyon sa distansya (gawas sa 12 Nautical Miles limit) nga paglupad sa ilang mga surveillance aircraft o paglawig sa ilang mga barko duol sa maong mga estraktura.

Makapalibog kini kaniadto kay sila mismo ang miingon nga wala nila giila ang pangangkon sa China sa maong mga teritoryo kay ilegal kini ug hulga  sa "freedom of navigation and over flights." Sa pagbutang nila kaniadto og limitasyon aksidente nilang gitahod ang maong limitasyon nga maoy giila sa international laws. Apan ning bag-ohay lang, gipahibalo sa Amerika nga palawigon niini ilang mga barkong panggubat diha mismo sa sulod sa 12 nautical miles limit gikan sa baybayon sa maong mga ilegal nga isla. Dili komportable niini ang China kay direktsa kining hagit sa Amerika.

Layo ra hinuon mahitabo nga bombahan sa China ang mga barko o abyon sa  US gikan sa maong mga isla, kay nasayod sila sa bawos nga buhaton sa mga Amerkano ug labaw sa tanan ang reaksyon unya sa tibuok kalibotan.

Mas maayo usab niini, nga suportahan sa Pilipinas dili lang sa estorya ang Amerika. Mopadala unta gihapon kini og barko didto aron pagpakita sa kalibotan nga ang WPS bukas sa nabigasyon sa tanan. Ug labaw sa tanan mapakita sa gobiyerno ngadto sa mga Pilipino nga wala lang nagsalig sa Amerika ang Pilipinas ug may baruganan usab kini nga suportado sa buhat.