Inita na sa politika

Si kanhi Fiscal Romulo Torres miawhag sa korte nga hukman kun husto o ilegal ba ang pagbaligya sa 45 ka hektareya’ng yuta sa South Road Properties nga gipaagi sa public bidding ug dili sa unsolicited proposal.

Kini pinaagi sa pag-file og Petition for Declaratory Relief ug nag-awhag nga pugngan sa korte ang dakbayan nga gastohon ang nadawat sa City Hall nga P8 Bilyones isip pasiuna’ng bayad sa gibaligya’ng yuta.

Mao kini ang rason nga wala pa aprobahi sa City Council ang giduso ni Mayor Michael Rama nga Supplemental Budget No. 1 (P2.8B) mentras dili pa maresolbar ang kaso.

Dili ba maayo nga ang City Legal Office maninguha nga mapadali ang pagsulbad sa kaso aron madeklarar nga dili ilegal ang pagbaligya sa yuta. Sa ingon nga paagi, dili na makapugong ang City Council.

Tan-aw nako, mura’g naleksyon g’yud ang mga konsehal, walay labot sa mga alyado sa Team Rama, nga kun mahukman nga ilegal ang pagbaligya, basin sila unya maoy pabayron sa P2.8 Bilyones.

Dili unta maayong balibaran ni Mayor Rama ang tinguha sa City Council nga magtagbo sila sa mga sakop sa Budget and Finance Committee ug sa Local Finance Committee.

* * *

Nagkanindot ang kalamboan sa politika diha sa Mandaue City. Kutloon nato ang report sa The Freeman kagahapon. Ang report mao nga nahukman na sa Liberal Party nga si Konsehal Lolypop Ouano-Dizon ang ilang kandidato pagka mayor.

Ang sama nga report nagkanayon nga ang Liberal Party mihukom nga si Kongresista Luigi Quisumbing padaganon lang pagbalik sa mao gihapon nga katungdanan isip magbabalaod sa 6th district.

Kun mao kini ang kamada sa politika diha sa Mandaue, nagpasabot nga sila si Quisumbing ug Mayor Jonas Cortes na maoy magkasangka sa pagka kongresista sa 2016 elections.

Pananglit mahitabo g’yud nga magkasangka sila si Luigi ug Jonas, mura’g lupigon g’yud ni Luigi si Jonas kay si Luigi ilado na kaayo sa ikaunom nga distrito.

Dunay miingon nga ang laing mahimo ni Jonas mao nga modagan na lang siya pagka bise mayor, apan ambot dawaton ba siya sa kampo ni Lolypop nga nakapili na man kini og iyang bise.

* * *

Nahibulong g’yud kaayo ko sa mga tawo nga miangkon nga sila alang sa maayo nga kagamhanan apan ngano kaha nga mipilit man sila pagsuporta sa kandidatura ni Vice President Jejomar Binay?

Wala malilong kanato nga si Binay wala g’yud makatubag sa pasangil nga siya nakahimo og kurapsyon atol nga mayor pa siya sa Makati.

Ambot kanus-a g’yud kaha tubagon ni Binay kining pasangil sa kurapsyon sa mahal kaayo nga parking building sa Makati ug daghan pa.