Propaganda ra sa NPA

To the Editor

The Freeman/Banat News

Jakosalem St. Cebu City

 Ang mga hunahuna nga gipadayag dinhi iya ra sa tagsulat ug wala’y labot ang Banat News ug mga sakop niini.

Sir/Madam:

Daghan na’ng balita nga akong nabasa bahin sa pag-abuso ug pagpamatay, pero kini nga nahitabo sa lumad sa Surigao, Davao ug uban pa nga bahin sa atong nasud nga gipatay sa mga armado nga grupo, mura’g gipaluyohan og dautang elemento sa atong katilingban.

Ang kalit kaayo nga pasangil nga ang mga miyembro sa militar o AFP ang nagpuo sa kinabuhi sa mga lumad, dili g’yud katuohan.

Ngano man nga nakasulti ko niini? Unsa man intawon ang makuha sa atong kasundalohan kun pamatyon nila ang atong mga lumad?

Usa pa, naay gibuhat karon ang atong gobiyerno nga suportado pa gani sa DepEd, DSWD, DOLE, DILG ug AFP nga paeskuylahon ni sila para makapanginabuhi duyog sa atong nagkabag-o nga panahon.

Sumala pa sa artikulo nga sinuwat ni Professor Solita Collas-Monsod nga nag-ulohan “Who is exploiting the Lumad?” daghang miuyon kaniya nga binuhatan kini sa “leftist groups” ug gipaluyohan sa ilang mga partylist representatives nga nakapuwesto na karon sa Kongreso.

Dili ba unsa ka tayming kaayo ang pagbuto sa maong isyu mahitungod kay duol na man pud ang piniliay sunod tuig. Kinsa man ang makabenepisyo niining panghitaboa? Ang mga sundalo ba? o ilang hugpo nga mga armado?

Kining tanan, budlay kaayo nga palandungon. Angay nato nga mahibaw-an ang ilang mga plano pagpasuko sa matag-usa kanato, aron mawagtangan kita og pagsalig sa atong kasundalohan ug aron mosuporta kita sa ilang lakang paggun-ob sa atong gobiyerno.

Unta maklaro kining tanan ug masilotan sa labing dali nga panahon ang responsable sa maong krimen aron mahatagan og hustisya ang kamatayon sa mga lumad. Daghang salamat ug maayong adlaw kaninyong tanan.