Mihupas ang kahawod

Pakyas na usab ang Pilipinas pagkuha sa korona sa FIBA Asia Championships dili pa lamang dugay. Sama sa gihapon, ang China maoy nagpabiling hari sa basketbol sa rehiyon human gipildi niini ang Gilas Pilipinas sa finals.

Maayo tuod ang gipakita sa Gilas sa unang hugna sa maong sangka. Nakalabaw kini og pipila ka puntos. Apan miarangkada ang tag-as ug batan-on nga mga Intsik aron pagkontrol sa duwa ug pagdaug sa kampiyonato.

Dako atong paglaum nga malangkat sa Gilas ang titulo sa dihang nakasulod kini sa finals. Apan walay swerte gihapon ang mga Pinoy. Gawas nga lig-on ang koponan sa China, ila pa ang homecourt advantage.

Ato na lamang dawaton ang kamatuoran nga nihupas na ang monopoliya sa mga Pinoy sa basketbol. Dili na kita ang hari niini sa Asya. Kini bisan pa man kun pabiling nag-una sa atong dughan ang basketbol sa natad sa paugnat sa kusog.

Sukad pa niadtong dekada otsenta, ang China na ang midominar sa Asya. Tungod lagi sa kugi’ng programa niini pag-develop sa maong dula, pipila ka mga Chinese players ang nakadula na sa NBA didto sa Estados Unidos.

Gikan niadto, wala na gayud kaugpo ang Pilipinas sa paghari sa China. Hinuon, tungod sa pagsulbong sa popularidad sa basketbol sa rehiyon, daghan nang nasud ang nakigkompetensiya sa China ug Pilipinas.  

Ang Japan ug South Korea nahimo nang tradisyonal nga karibal sa Pilipinas. Apan dili lamang kana. Misulbong na usab ang Iran, Lebanon ug Jordan isip bag-ong mga contender sa basketbol sa rehiyon.

Tungod niini, morag hangak na sa Pilipinas nga mabawi pa ang titulo isip hawod sa basketbol sa Asya. Kini bisan pa man sa mga Fil-Am players nga maoy nagrepresentar sa nasud sa mga internasyonal nga kompetisyon. Dako gayud nga disadvantage ang pagkawalay konkretong lakang sa atong mga sports officials alang sa tinuoray nga paglambo sa basketbol sa nasud. Kontento na kita kun maka-recruit og players nga adunay mga dugong langyaw aron pagpalig-on sa atong lineup.

Sa akong nakita, anaa sa planning ug preparasyon ang problema.