Pagkalahi na g’yud

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Giubanan nako ang akong apo nga si Jaleel sa eskuwelahan. Gipatawag ang mga ginikanan sa mga estudyante nga kanunay ma-late.

Dili sila makaeksamin kun wala’y ginikanan nga moadto sa ilang Guidance Coordinator aron masayod sa kahimtang sa ilang mga anak. Tungod kay sayo ang trabaho sa mama ug papa ni Jaleel, ako na lang ang nikuyog kaniya.

Pag-abot namo sa opisina sa Guidance Coordinator, wala usab diha ang maestra kay nag-handle pa og eksamin sa mga estudyante.

Didto na lang ko nagpaabot sa canteen kay makita ra man ang maestra inig-agi niya paingon sa opisina. Samtang naglingkod ko, nagkalingaw ‘sab ko’g tan-aw sa mga estudyante.

Diha’y akong nakita nga tingali manag-uyab kay naghinungitay man sila og siopao. Ang babaye ang una nga mihungit sa lalaki. Dayon gihungitan usab sa lalaki ang babaye.

May babaye ug lalaki nga nagpaingon sa canteen nga nag-inagbayay. Ang mga magtutudlo ug mga estudyante ingon sa wala lang. Bahala sila. Pagkalahi na g’yud. Niadto sa estudyante pa ako sa tuig 1964-1968, gibati usab nako nga maibog og babaye. Nanguyab ko. Diha nga nanguyab ko, namisita g’yud ko.

Adto sa balay sa babaye, ihalad nimo ang imong gugma. Usa ka higayon nanguyab ko og sama nako nga estudyante. Sa wala pa ko niya sugta aduna mi kasabotan.

Una, dili ko moinom og bino, ikaduha dili ko manigarilyo, ikatulo, dili ko moduol niya didto sa school campus aron dili mi masabtan nga kami uyab. Ikaupat kinahanglan mamisita sa Sabado sa hapon ra g’yud ug wa’y Domingo kay mag-andam na para sa klase pagkaugma.

Tinuod wala mi magkadayon apan ako g’yud gituman ang tanan namo nga gikasabotan. Anaa pa kaha na karon? Ambot, busa nakaingon ko. Pagkalahi na g’yud karon.