EDITORYAL - Maayo pang mag-debate

Maayo ang plano sa Comelec nga gihimoan dayon og panawagan diha sa Ubos Balaybalauranan nga mopahigayon og presidential debates sa mga presidential candidates sa nasud matag adunay eleksyon.

Ang panawagan gipaagi pa og usa ka balaudnon nga mao ang House Bill 5269 alang sa pagtukod og Presidential Debate Commission nga giduso ni Nueva Ecija Rep. Estrellita Suansing ug gisuportahan usab sa kinabag-an sa mga magbabalaod pinangulohan ni House Speaker Feliciano Belmonte.

Angay na gyung usbon kining naandang sistema nga ang pagpili sa mga kandidato gibase na lang sa kung kinsay popular imbes nga sa kalidad sa usa ka lider.  Sa pagkakaron, ang pirmeng makita sa katawhan mao ang mga bati, akusasyon, alegasyon, bugalbugal ug uban pa bahin sa ilang mga kandidato nga ang resulta, nabahin-bahin ang katawhan.

Makatarunganon lang nga mapakita sa mga nag-ambisyon sa Malacañang ngadto sa mga botante ang ilang mga plataporma de gobiyerno, lokal ug nasudnong programa ug mga solusyon sa mga isyu niini; local, national ug foreign policies; ug direksyon nga buot taakon sa mga kandidato kun sila makadaog. Nailhan lang sila karon tungod sa popularidad ug personalidad, inay nga kalantip sa panghunahuna, lig-ong baruganan sa mga isyu ug mga maayong hiyas unta nga maoy gipangita sa mga botante. Kun maimplimentar kini , mahatagan og giya ang katawhan aron mopili og kandidatong mas angayan nga modumala sa nasud.

Makita dayon kinsa kanila ang walay  klaro nga nagsalig lang sa popularidad ug nadala sa hulhog sa mga tawong dunay kaugalingong interes.

Kinahanglan himuon kini nga rekisitos alang sa tanang kandidato nga presidente ug bise presidente.

Ipasalida kini sa mga national television imbes nga himuon kada rehiyon nga maoy gisugyot karon.

Kay gawas nga gastos kini kaayo, posible pang daghan ang molikay ug himuong rason nga atoa kini sa laing rehiyon nangampanya.