Kampanya batok dengue

Gitapok gahapon sa buntag ni Cebu City Mayor Mike Rama ang kapin 5,000 ka trabahante sa Cebu City Hall uban sa pasidaan nga compulsory ang ilang attendance alang sa ipahigayon nga lapad nga larvicidal campaign batok dengue.

Giestrikto sa mayor pagmonitor ang ilang attendance.  Kadtong ma-late sa alas 6:30 sa buntag nga panagtapok sa Cebu Coliseum dili na makasulod. Gipasirad-an sa mayor ang pultahan.

Apan usa ka kasaligan nga tinubdan nibutyag ang mayor maoy na-late sa pag-abot. Nakasugod ang ilang briefing alang sa larvicidal campaign alas 8:00 na sa buntag. Dungan nga gilusad sa mga nitunga nga kawani sa Cebu City Hall, kauban sa mga sakop sa Emergency Rescue Unit Foundation (ERUF) pinangulohan ni Dr. Wyben Briones ang larvicidal campaign ngadto sa 50 sa 80 ka barangay sa dakbayan sa Sugbo.

Gipakatap ni Mike Rama ang mga department head kauban sa ilang mga ginsak’pan ngadto sa mga barangay aron sungkuon ang mga dapit  ug ang mga panimalay nga posibleng gipuy-an sa daghang lamok nga nagdala sa sakit nga dengue.

Base sa record sa Department of Health sa rehiyon 7, niabot na sa 19,104 ang kaso sa dengue ug may 89 na ka tawo ang nangamatay sa nanglabay’ng katuigan. Ang dakbayan sa Sugbo nga may 5,698 ka kaso, namatyan na usab og 21 ka tawo.

Samtang si City Health Officer Daisy Villa mitataw nga karon lang tuiga, gikan niadtong Enero hangtud Septiyembre 30, miabot na og 11 ka tawo ang namatay sa dengue dinhi sa dakbayan.

Nakita sa mga kawani sa Cebu City Hall nga nisalmot sa larvicidal campaign ang kadaghan sa nguyo-nguyo diha sa mga napundo nga tubig sa mga kanal ug sa mga wala na gamita nga atabay.

Gawas sa lapad nga larvicide campaign, ila usab gihatagan og leaflets ang mga molupyo mahitungod sa mga kasayuran labot sa dengue ug ang angay buhaton aron malikayan ang makamatay nga sakit.

Sa maong leaflets may English transcription ug aduna usa'y binisaya.  Giangkon sa pipila ka kawani nga nadasig sila sa paghingusog sa kampanya human nila masayri sa briefing ang posibleng kadaghan sa mga tawo nga mangamatay kun dili mapatay ang mga lamok nga nagdala sa dengue.

Basi sa Wikipedia.org. ang babaye nga lamok mabuhi sulod sa usa ngadto sa duha ka semana, maka-itlog og 100-200. Sa tibuok kinabuhi sa usa ka babaye nga lamok, maka-itlog kini og 1,000 ngadto sa 3,000.

Unta kanunayon sa dakbayan sa Sugbo ug dili kay kausa ra himuon ang maong matang sa kampanya.  Ang mga opisyal sa barangay kanunay mopahinumdom sa mga molupyo nga kinahanglang uga ug limpyo ang ilang palibot aron dili mosanay ang mga lamok nga nagdala sa kagaw sa dengue.