Angay’ng pangdakpon na

Kining grabe na kaayo kasaba nga mugna sa mga tambutso sa mga sakyanan, ilabi na ang mga motorsiklo nga gituyo g’yud pagpakusog ang tingog, angay na g’yud nga kampanyahan.

Adunay gitawag og “Noise Pollution.” Sa akong baruganan, kabahin kini sa tahas sa mga magbabalaod nga nangulo sa Committee on Environment sa lainlain nga mga City ug Municipal Councils ingon man diha sa Cebu Provincial Board.

Dili angay nga kaluy-on ang mga drayber sa mga motorsiklo nga migamit nianang saba kaayo nga matang sa tambutso, kanang gitawag nila og “bora-bora” nga puwerte g’yud kasaba.

Pagpalit nila sa motorsiklo, ang orihinal nga tambutso dili man saba, apan tuyoon g’yud sa mga abusado nga tag-iya og motorsiklo nga ilisan kini og tambutso nga saba.

Ngano man? Aron lang g’yud nga makahasol kamo sa katawhan, ilabi na kadtong mga nagpuyo daplin sa karsada? Wala tingali sila masayod nga ang multa niini P15,000.

Hagiton nato si Konsehal Nestor Archival, kay ikaw man ang chairman sa committee on environment sa Cebu City Council, nga aksyonan nimo kini nga reklamo sa katawhan sir.

Anhi nato dinhi masukod kun angayan ka ba g’yud nga mahimo’ng bise mayor nga maminaw sa reklamo sa katawhan.

* * *

Sa politika, mura’g tan-aw nako nagkahinay man si Grace Poe ug dili na kaayo siya hulga ni Mar Roxas. Bana-bana nako nga anam-anam na nga nakasabot ang katawhan nga ambisyosa ra kaayo si Grace Poe nga mag-presidente bisan kuwang og kasinatian.

Samot na dinhi sa dakbayan sa Sugbo nga gipasanginlan ni Poe nga gitikasan ang iyang ama-ama nga si FPJ tungod lang kay napilde sa iyang pagpapili pagka presidente.

Malagmit nga kun mapilde na ‘sab si Grace Poe sa eleksyon sunod tuig, ingnon na ‘sab nga kitang mga Sugboanon mga tikasan. Pahuway Grace uy!

Tan-aw nako, ang lig-on nga ikasangka ni Mar Roxas mao pa si Rodrigo Duterte. Mas humot pa si Duterte kay ni Grace Poe. Aw, kanilang duha ni Duterte ug Mar Roxas, tan-aw nako mas bentaha pa g’yud si Mar.

Si Vice President Binay dili na lang nako kaayo hatagan og pagtagad kay nasukamod na pag-ayo. Tungod kini kay hangtud karon wala pa niya matubag pag-ayo ang mga pasangil nga siya nakahimo og kurapsyon diha nga mayor pa siya sa Makati.

Dili nato mabasol ang katawhan nga magpanagana g’yud kay basin og lain na usab unya nga anomaliya ang iyang malambigitan kun padag-on siya.

Si Mar Roxas wala g’yud malambigit og mga anomaliya.