Way libreng kaon
Samtang nagkaduol nang piniliay sa Mayo 2016, angay’ng sublion sa mga sakop sa media ang ilang mga lagda paglikay nga mapalit sila o madudahan nga napalit sa mga politiko. Usa sa labing yano apan labing lisod sang ipatuman mao ang lagda sa pagkaon o di pagkaon uban sa mga politiko nga nangampanya.
Kasagaran sa media organizations nidili sa ilang mga kawani sa pagpalibre og kaon sa mga politiko. Gipahinumdoman sila nga may inadlaw silang meal allowances. Gitugotan hinuon sila sa pagkaon kun may kaubang daghang mga tawo, sama sa press conferences, labi na kun manubag ang mga politiko og mga pangutana samtang nangaon.
* * *
Mao ni kundisyon sa akong pagdawat sa imbitasyon ni Cebu City Mayor Mike Rama nga mokuyog mi niya pagbaktas sa mga dan Gorordo ug Salinas pila ka Domingo nang nilabay: Nga kami ang mobangka og pamahaw human sa lakaw aron maminaw mi sa iyang mga plano ug maminaw siya sa among mga sugyot.
Nisugot si Rama. Apan wa ko mokumpiyansa. Nagpustaanay man gud mi og paniudto pila ka NBA Finals ang nilabay. Napilde man ko, siyay nipili og restaurant nga among giabotan kuyog sa akong asawa ug ni kanhi konsehal Joy Pesquerra. Sa binayranay na, mas dako iyang tingog busa nahudlat ang waiters ug iyang bayad maoy ilang gidawat. Maong pagsugod pa lang namo’g lakaw gipatangdo nako siya og usab.
* * *
Pagkahuman na sa lakaw, giingnan ko sa mayor nga siya lay mobayad sa pamahaw. Gipahinumdoman nako siya sa among sabot. Gisugo niya ang among mga kuyog pagpangita og kinadul-an nga makan-an. Nisugyot ang usa ka opisyal sa City Hall nga adto mi sa kinaham ni Rama nga kan-anan og isda sa North Reclamation Area. Nihangyo ko nga sa pungko-pungko lang kay kami ra bay mobayad.
Nakakita ang mga gisugo sa mayor og karenderya atbang sa TESDA. Kay labihan na mang gutoma, nagsugod dayon mi og pangaon. Human sa pila ka hungit, nakabantay ko nga labihang punoa sa karenderya kay tanang kuyog sa among lakaw niapil og pangaon.
* * *
Pulos nag-asu-aso pa kay bag-ong haon ang among pagkaon--tinowa, torta ug balbacua. Pagsugod og kinamot ni Rama sa iyang tinowa, gihikap nakong akong pitaka pagseguro nga duna koy ikabayad. Apan nakugang gihapon ko pagkakita sa gidak-on sa among bayranan.
Nakahinumdom tingali sa akong katihik, nangutana og balik ang mayor seguro ba gyod kong ganahan nga mobayad. Ako siyang gipasaligan nga bag-o ming nasuweldohan. May leksiyon hinuon kong nakat-onan: Sunod higayon nga maghilas-hilas mo og imbitar sa mayor og pamahaw, palihug hangyoa siya nga di magda sa dul-an sa 50 ka kawani sa CCTO, PROBE ug ubang departamento sa City Hall.
- Latest
