Pagpalit og sakyanan kontrolahon

Giduso karon sa ubos balay balauranan ang House Bill No. 5098 nga gitawag og Proof of Parking Space Act.

Ang tumong ug tuyo niining maong balaudnon mao ang pagkontrolar sa pagpalit og mga sakyanan.

Ubos niining mao nga balaud dili na baligyaan og sakyanan kadtong dili makapakita og sertipikasyon nga may parking area siya nga giandam alang sa iyang paliton nga sakyanan.

Kining mao nga balaudnon mao ang tubag sa mga magbabalaud sa nagkagrabe nga suliran sa trapiko dili lang didto sa kaulohan, kun dili apil na usab dinhi sa ato.

Base sa mga datos sa Metro Manila Development Authority adunay 25 mil ka sakyanan ang manggawas matag buwan nga nakadugang og 2.5 milyones ka sakyanan didto sa Metro Manila.

Dinhi sa Sugbo atong makita sa daplin sa mga gagmay nga dalan ang mga naglinya nga sakyanan nga gipang-parking nga nakalangay ug nakamugna og kahuot sa trapiko.

Ang mga sakyanan nga gipang-parking sa gagmay nga mga dalan naghatag og kahasol sa mga bombero sa ilang pagtubag sa alarma sa sunog. Busa adunay punto kining maong balaudnon.

Maayo ang tumong ning mao nga balaudnon, ang problema kun mapatuman ba kaha kini sa hingpit pananglit mahimo kini nga balaud sa hingpit.

Adtuon kaha sa mga mamaligyaay og sakyanan ang balay sa mga mamalit og sakyanan aron ila nga sutaon kun tinuod ba ang gidala nga sertipikasyon nga may parkinganan sila sa sakyanan nga ilang paliton?

Dili lang kaha maggikan sa mga ahente og sakyanan ang sertipikasyon aron mahalin dayon ang ilang baligya nga sakyanan?