Ang problema sa ilegal nga drugas

Nakaangkon man tuod og hustisya ang pamilya niadtong 17-anyos nga tinun-an kinsa brutal nga gipatay sulod sa ilang pinuy-anan sa dakbayan sa Lapu-Lapu human napatay ang suspetsado nga kriminal nga si Ruben Fernandez, apan giklaro sa amahan nga dili hingpit ang kalipay nga ilang natagamtam.

Bisan sa kamatayon sa suspek, dili mahibalik ang kinabuhi sa maong batan-on nga posible pa unta nga may dako’ng matampo alang sa kaayohan sa katilingban.

Paet hunahunaon nga nausik ang usa ka inosente nga kinabuhi bunga sa usa ka iresponsable nga binuhatan sa usa ka tawo nga nagumon sa ilegal nga drugas. Angay pa ba gihapon nga ilhon ug konsiderahon nga biktima ang usa ka drug user kun una sa tanan nakahibawo siya sa iyang dangatan apan iya gihapon nga gituyoan ang pagsulod sa maong bisyo?

Dili ba nga sama ra nga ato sila nga gipaundayonan ug gidasig nga mopadayon sa sayop nila nga binuhatan kun padayon nato sila nga ilhon nga biktima?

Sa mga pamilya nga adunay mga anak, bana, asawa, uyoan, iyaan o mga ig-agaw nga mga adik, makasiguro ka pa ba sa inyong kaluwasan kun diha mismo sa inyong panimalay gikauban ninyo ang maong matang sa mga tawo nga wala na sa ilang husto nga panghunahuna?

Ngano nga bukid man g’yud sa atong kabubut-on nga mapa-ubos sila sa rehabilitation kun makaya pa sa rehabilitation o i- report sa kapolisan ang paggamit ug pagbaligya sa ilegal nga drugas?

Kakabus ba tinuod ang nagtukmod niining maong mga drug pusher ug drug lords sa pagsulod niining maong matang  sa ilegal nga negosyo?

Kakabus ba usab ang hinungdan nga gipakabayani sa komunidad ang usa ka drug lord nga mura og si Robin Hood tungod kay kusog motabang ug manghatag og kuwarta ngadto sa nagmasakiton, ug wala’y gikaon?

Di ba kaha nasubrahan na ang tawo sa kasina ug materyalismo ug inanay na nga nawala kaniya ang mga mithi sa pag-antus, paglaum, kakugi ug labaw sa tanan ang pagtuo, kahadlok ug pagsalig sa Labaw nga Makagagahum? Nag-anam kalapad ug nagkalipang ang negosyo sa ilegal nga drugas. Mga ilado ug inpluwensyado nga mga personalidad ang gilambigit.

Tungod niini, nagkadaghan ang mga nagumon ug nagkadayag ang pagpamaligya tungod kay sama sa wala na sila’y gikahadlokan.Ang pagpatay sa suspek nga si Ruben Fernandez nakapatumaw sa mga pagduda nga posible’ng duna’y mas dako nga personalidad nga namiligro nga mabulgar kun madakpan siya nga buhi.

Mahimo nga wala kini kalambigitan sa pagpatay sa 17-anyos nga tinun-an, apan posible nga mabulilyaso ang iyang pagkatawo ug ang ilegal nga kalihukan kun “ikanta” usab siya ni Fernandez.