Dili ba tinuod?

Gimando ni Mayor Michael Rama ngadto sa kapolisan nga ipadakop g’yud si Jeffrey Diaz nga maoy tinuod nga ngalan ni Jaguar, ang gitumbok nga druglord nga nag-operate diha sa Barangay Duljo-Fatima.

Apan kay wala man g’yud niya mapugos ang kapitan ug ubang opisyal sa Barangay Duljo-Fatima nga moaktibo sila pag-abag sa kapolisan aron masumpo ang krimen, gidudahan si Rama nga kakonsabo.

Para nako, dili ‘sab tingali makiangayon para ni Rama. Apan labaw nga dili usab makiangayon ang pamahayag sa mga kaalyado ni Mayor Rama nga kay midaog si Tommy Osmeña diha sa Duljo-Fatima, misuporta si Tommy sa giingong druglord.

Akong gitimbang-timbang nga wala’y usa kanila ni Rama ug Osmeña nga nakigkunsabo kang Jaguar, apan angay lang nga kun kinsa kanila ang modumala sa kagamhanan sa dakbayan, maninguha g’yud nga sulbaron ang problema diha sa Duljo-Fatima.

Ang husto nga buhaton ni Rama mao nga dili na niya pahatagan og additional honorarium gikan sa City Hall ang mga opisyal nga klaro kaayo nga nagpabaya sa problema sa tagsa-tagsa nila ka barangay, usa niini si Elmer Abella, ang kapitan sa Duljo-Fatima ug ang mga kauban niyang opisyal.

Ang paghatag og dugang honorarium sa City Hall ngadto sa mga opisyal sa kabarangayan gitumong aron nga sila moaktibo pagtabang sa City Hall pag-atiman sa mga problema diha sa ilang barangay.

Apan may gihimo ba gud kini si Abella? Higala nako kini si Abella, apan bisan pa, dili ko molaban kaniya kabahin niini’ng pagsaway sa katawhan kaniya kay angay lang g’yud siya nga sawayon!

* * *

Mireklamo si Art Barrit, usa ka opisyal sa ALU-TUCP, nga ang gihatag sa TUCP Partylist nga Multicab ngadto sa Barangay Pahina San Nicolas, gipagamit kuno sa politikanhong kalihukan ni Konsehal Gerardo Carillo, ang pagpahigayon kanunay og Karaoke Singing Contests sa kabarangayan.

Angay lang nga moreklamo, dili lang si Barrit, kondili ang mga magbubuhis. Ang kuwarta nga gipalit nianang mao nga multicab gikan sa buhis sa katawhan.

Para nako, ang pagpahigayon og Karaoke Singing Contests unya naay tarpaulin nga may ngalan ug hulagway ni Carillo usa gayud ka pagpamolitika, bisan og moingon pa si Konsehal Carillo nga dili kini pamolitika kay wala pa may kampanya.

Wala man gud ta matawo nga kagahapon lang adlawa. Bisan si Konsehal Carillo nasayod nga ang kampanya, bisan dili pa opisyal, himuon bisan wala pa ang official campaign period.

Ang ikatambag nako ni Konsehal Carillo, “pinoha” ang imong mga lihok kay daghan ang nagpaniid kanimo. Daghan ka man og kuwarta sir, kay milyonaryo ka man base sa imong SALN, pag-abang og sakyanan para nianang mao nga kalihukan.