Gigamit ra nga paon

Usa ako sa nagsunod kanunay ning mantalaan ug hinaut nga mahatagan kini og pagtagad ang akong tampo sa Tingog sa katawhan.

Naa ko’y amiga nga usa ka elected barangay councilor sa Brgy. San Vicente, Trinidad, Bohol ug kining akong tampo lakbit saysay kini dili lang sa iyang personal nga problema kun dili lakip na ang iyang ka-barangay.

Kanhi siya miyembro sa grupong Talibon Trinidad Integrated Farmers Association (TTIFA) nga gi-organisa sa nagpayong nga organisasyon, ang Hugpong Mag-uumang Bol-anon (HUMABOL) sa wala pa siya mapili nga konsehal sa ilang barangay.

Dili ko lang ibutyag ang tinuod niyang pagkatawo tungod sa tumang kahadlok basin bawsan sila sa ilang mga lider ug kauban sa organisasyon. Na miyembro kini siya ug ang iyang pamilya sa pangindahay nga makihiusa siya sa pareha nilang mag-uuma nga makaangkon og yuta kay mao kini ang pasalig sa organisasyon.

Tuig 2012 sa dihang nakadesisyon siya nga mohawa sa organisasyon tungod kay iyang namatikdan nga wala gyud kini natabang kanila ug gani nagdako lang ang ilang gasto sa tampo-tampo nila og kuwarta para sa organisasyon kada-buwan. Ang dili pa gyud niya ganahan pasigehon sila og apil og lihok protesta sa grupong HUMABOL ug dili na man isyu sa yuta ang ilang gituki kun dili palagputon na man ang atong Presidente.

Dili  lang tungod sa iyang paghawa nasuko ang lider sa HUMABOL kun dili ang iyang pag-organisar og kabatan-onan para suportahan ang presensiya sa mga sundalo sa ilang lugar kay nasayod siya nga daghang mga proyekto ang mahimo sa mga sundalo sa gobiyerno kompara sa mga organisasyon diri sa Bohol nga wala’y klaro ang paingnan.

Ilang nasuta nga mura’g gigamit lang sila og paon niining mga grupoha para masupak nila ang mga proyekto sa gobiyerno diri sa among lugar nga bisan ang tubig sa ilang barangay halos dili na man ipagamit kanila.

Para sa kasayuran sa tanan, kining ilang problema ila na nga gipadangat sa Commission on Human Rights (CHR) kontra sa HUMABOL tungod nagsige na man sila og panghadlok para mokuyog ang mga mag-uuma sa ilang mga rally ug pugngan ang pagkampo sa militar sa ilang lugar.

Mao ra kini ang gusto kung ipadangat ug daghang salamat.