Hudas not pay!

Sirado ug sulbad na ang kaso sa linuog nga pagpatay sa 17 anyos nga si Karen Kaye Montebon segun sa kapolisan human mapatay ang gitumbok nga prime suspect nga si Ruben Fernandez didto sa gamay’ng isla sa lungsod sa Getafe, Bohol.

Dungan sa kamatayon ni Fernandez nalubong na usab ang ubang detalye sa panghitabo kun siya ra ba ang mihimo sa krimen o may katambayayong siya paghimo sa salaod. Dili na kini mahatagan og tubag kay patay na man ang suspek ug gitapos na usab sa kapolisan ang imbestigasyon diin gipadaplin na ang posibilidad nga nalambigit sa krimen ang live in partner ni Fernandez nga si Gennalyn Soon.

Apan luyo niining tanan, dili malikayan nga adunay mga pangutana gihapon kun inosente ba g’yud ang kapuyo ni Fernandez? Posible ba nga apil sa plano o ba kaha siya ang nagsugo kang Fernandez nga manguha sa mga butang sa balay sa mga Montebon aron duna silay magamit alang sa dautang bisyo?

Dihang nabatyagan sa kapuyo nga maapeki na sila kay natumbok na sa mga otoridad ang responsable sa krimen, dili kaha giseguro na lang niini og luwas ang iyang kaugalingon ug nakigtamtabayayong sa mga otoridad?

 Basin baya kun sa sinugdanan nagdahom kini nga mahiadto kaniya ang P500 mil nga gitanyag ni Mayor Paz Radaza alang sa makahatag og inpormasyon sa dali nga pagsikop sa kriminal ug labaw sa tanan makalingkawas  na sa salaod, makasapi pa.

Hinoon gitataw sa hepe sa Lapu-Lapu City Police Office nga dili mahiadto sa live-in partner ni Fernandez ang reward money. Si Soon ang nagdala ni Fernandez sa balay sa mga Montebon, ug mabaw ra kaayo ang iyang sugilanon nga gibilin siya ni Fernandez dihang nahutdan og gasoline ang gisakyan nilang motor.

Mabaw ra tuod kaayo ang unod sa script ni Gennalyn Soon apan nakapakombinser kini sa kapolisan. Angayan unta nga mohimo og background check ang kapolisan niining Gennalyn Soon kay basin og siya ang nagplano sa tanan apil na sa pagkamatay ni Fernandez aron matabonan ang kamatuoran. Kun tinuod man ang pangagpas, ang tinuod nga hudas maoy nakalingkawas!