EDITORYAL - Ngano kaha no?

Nganong di man moendorsar og partikular nga kandidato ang Simbahang Romano Katoliko panahon sa eleksyon sama sa gibuhat sa ubang mga relihiyosong pundok pinaagi sa gitawag og bloc voting.

Kung tan-awon ang populasyon sa Pilipinas mayoriya niini mga sakop sa Simbahang Katoliko, nagpasabot kini nga daghang botante gikan pa lang niining maong pundok.

Pinaagi sa maong gidaghanon, bisan atbangan pa sa ubang mga relihiyosong pundok nga aduna say gisuportahang laing kandidato, masiguro gihapon sa Simbahang Romano Katoliko nga modaog ang mga lider nga ilang gustohon.

Si Father Roberto Ebisa, SVD, general manager sa sibyaanang DyRF nga speaker sa panagtigom Cebu Citizens Press Council kagahapon niingon nga higpit nga gipahimangnoan sa Catholic Bishops Conference of the Philippines ang kaparian ug mga obispo nga dili sila mosalmot sa 'partisan politics.' Matud pa usab niya, wa pay gihimong pagtuon dinhi sa Pilipinas nga nagpakitang nakapadaog og usa ka kandidato ang usa ka partikular nga relihiyosong pundok.

Ang tigpamaba sa Artsidiyosisis sa Sugbo Msgr. Joseph Tan nagkanayon usab sa maong panagtigom nga di buot sa Simbahan gawngan ang mga tawo kinsay botaran,  ilang adbokasiya ang pagbotar gamit ang konsensiya.

Naglikay sila sa mamugnang kasamok ug sa kadugayan kurapsyon nga mahitabo kun pugson ang katawhan pabotaran ang gusto sa simbahan nga  pabor sa mga doktrina ug pagtulon-an sa simbahan.

Kung sa tan-aw sa mga lider sa Simbahan mao ang kaayohan sa katawhan nganong dili man tuod no? 

Base sa mga rason nga gilatag sa unahan, mas maayong magpabilin ang Simbahan sa maong baruganan kay malikayan pa ang mas dakong kagubot imbes na ang gusto nilang mahitabo.

Ang labing maayong buhaton mao ang pagsunod kun unsay gidiktar sa konsensya aron sa ingon dili magmahay sa kataposan.