Kinsay sinsero?

Mas maayo nga adunay daghang pilian ang mga botante sa eleksyon karong 2016. Nindot ang resulta ning demokratikanhong kalihukan sa nasud sunod tuig kun ang tingog sa mga tawo ang matuman.

Mao kini hinungdan nga daghang ganahan nga tulo o upat ang magsangka pagka-presidente.

Pagkakaron, ang klaro nga modagan sa 2016 mao sila si Bise Presidente Jejomar Binay nga nabulit og mga isyu nga kurapsyon ug pagpadato sa pamilya pinaagi sa gahum.

Dayon si kanhi DILG Secretary Mar Roxas nga bisan sa iyang popularity rating nga mi-overtake na kang Binay ug maoy makatagamtam sa makinarya sa gobiyerno naninguha pag-ayo nga mailhan.

Unya, si Senador Grace Poe nga wala pa’y kasinatian sa panggobiyerno ug nag-atubang og disqualification sa Senado kay dili diay natural-born Filipino.

Daghan ang miingon nga angay botohan ang adunay “sincerity.” Apan alang kanako, mag-unsa man kanang sincerity sa presidente kun wala siya’y kabangkaagan sa panggobiyerno? Ang mahitabo, ilaron lang siya sa mga tawo sa iyang palibot.

Ang akong gikuyawan kun ma-presidente si Grace Poe mao nga ang mahimo niyang “maestro” mao si Chiz Escudero. Nakaila na kita ni Chiz.

Gawas nga gibiyaan niini ang iyang asawa ug giputol ang iya unta nga “one happy family” ug gibaylo ni Heart Evangelista, nailhan kini sa pagkatraydor sa coalition niadtong 2010.

Kay ngano, si Grace Poe ra diay ang sincere nga kandidato?

* * *

Wala pa kita makadungog nga may resulta na ang imbestigasyon sa kagamhanan sa siyudad sa Mandaue kabahin sa landslide sa Villa Sebastiana sa Barangay Casili nga iya sa Aidfaz Development Corp., nga usa sa mga tag-iya ang pamilya ni Mayor Jonas Cortes.

Gi-report sa pamantalaan nga wala’y environmental compliance certificate sa DENR ang subdivision, apan unsa’y aksiyon sa DENR niini.

Kun gigamit ni Jonas ang iyang gahum aron ma-develop ang subdivision bisan wala’y permiso sa DENR ug sa Mandaue City, maayo nga adunay Mandauehanon nga mobarug aron mosang-at og kaso batok niya sa Ombudsman.

Si City Administrator James Abadia misaad og imbestigasyon, apan dili kita makapaabot og tarong nga resulta nga molansang sa mayor kay tawo man siya ni Jonas.

Apan nganong wala’y mipasaka og kaso batok sa mayor?

* * *

Niadtong Lunes sa gabii, huot kaayo ang traffic sa South Coastal Road sugod sa taytayan sa San Roque paingon na sa Talisay City Hall. Mibiya ko sa siyudad 8:20 PM apan naabot ko sa Pakigne 10:30 PM na.

Bisan gabii na’ng dako, gigamit gihapon ang traffic light sa coastal road bisan mga traysikad na lang ang manglabang sa mga dalan sa Talisay. Unsa man ni, Mayor Johnny delos Reyes? Nagdula ra mo?