Gibaligya ang yuta sa usa lang ka heir

Dear Atty. Divine,

Ang akong ugangan nga patay na, adunay gibilin nga yuta. Aduna siya’y pito ka anak, apil na ang akong bana nga maoy kamanghuran nga lalaki. Patay na sab silang tanang mga anak, apil ang akong bana.  Apan usa sa mga anak sa igsuon sa akong bana mibaligya sa tibuok yuta nga wala mananghid sa ubang mga heirs ug wala gani sila makapirma. Mahimo ba diay na attorney nga ibaligya ang property nga wa’y pirma sa ubang mga heirs? Ang akong mga anak dili manghilabot kay mahadlok kuno sila, ako isip asawa sa usa sa mga heirs, puwede ba nga ako ang mangusog niini? Ang gitukuran sa among balay maoy ilang nasabutan kaniadto nga maoy bahin sa akong bana, apan karon ila na kami nga papahawaon. May katungod ba sila nga mopapahawa namo?  Unta imo mi nga matambagan kun unsa ang angay namo nga buhaton. — Berta

Dear Berta,

Base sa balaod, kanang kabilin nga yuta sa imong ugangan pagkamatay nila dapat bahinon kana sa kapito o tag-usa ka share matag anak. Apan tungod kay patay na man ‘sab ang tanang mga anak, ang mga heirs sa mga nangamatay nga mga anak maoy morepresentar o mokuha sa bahin sa ilang ginikanan nga namatay. Sa ato pa, ang imong bana nga namatay adunay usa ka share sa maong yuta ug kay patay na man siya, ang inyong mga anak maoy makaangkon o mokuha sa iyang share. Kun gibaligya sa usa lang ka heir ang yuta, then dili balido ang maong pagbaligya sa share sa ubang heirs, balido lang ang pagbaligya kutob lang sa share sa heir nga nagbaligya. Ang maayo ninyo nga buhaton karon mao ang pagpasaka og reklamo sa inyong barangay batok niadtong tawo nga nagbaligya sa yuta. Kun ang imong mga anak dili interesado mahimo ka nga mangayo kanila og Special Power of Attorney kon SPA aron ikaw ang morepresentar kanila. Kanang inyong gitukuran sa balay kun mao na ang bahin sa imong bana then mahimo ka nga dili mohawa sa maong lugar kay adunay katungod ang imong mga anak sa maong property. Thanks and God Bless. – Atty. Divine